Abrahaam Saamueel
Addi Ababa:- “Dhuka gumunni; jifo seyootenni” yaanno uminni sasu barrira Sidaamu Dagoomi Qoqqowi giddo noo Jireenyu Paarte Aliidi massagaanora uynanni keeshshinonni qajeelshi goofino.
Qajeelshu battalara xaphoomu loosu biddishsha uynohu Sidaamu Dagoomi Qoqqowu Pirezidaantichi Kalaa Desta Ledamohu, qajeelshu battala paartenkenna mootummaneke hanaffinoha latishshu, danchu gashshooti, keerunna dimokiraasete ijaara hegersino garinni buuxisiisate massagaanote widoonni hedotenna loosu mittimma kalaqate dhuka aannota xawisno.
Baca dagoomu mittimmanna roduuwimmate ayyaani aana xinxaminoha Itophiyu gutu mittimma buuxisiisate massagaano xaaddannonsa jifo ikkadimmatenni sa”a dandiitanno gede assatenni qoqqowaho noota kaayyo gumu widira soorrate,hattono dagate horaamimma buuxisiisa hasiissannonsata Pirezidaantichu xawisino.
Sidaamu Dagoomi Qoqqowi Jireenyu Paarte Sinu Borro Mini Sooreessi Kalaa Abrahaam Maarshaalohu isi widoonni,hallanyu polotiki hasatto qineessidhara madde higge milli yatannori polotiku daddalaano jireenyu harinsho aana guficho ikkitannota massagaano seekkite buuxa noonsaata huwachshino. Yanna yannatenni xaaddanno jifo massagaano kaajjite sa`anni paartete wodho aana xintaminoha massagaanote qeecha fultanni dagate xa`mora dawaro qola noota xawisino.
Qajeelshu battala haaro polotiku huwanyonna laooshshe massagaanote kalaqannoho; loosu aana leellannoha polotiku millimillonna harinshono hanqafinoha ikkinohura, massagaano yannate polotiku xa`mo hasidhanno dhukinni massagatenni, kaajjado paartenna mootumma kalaqantanno gede qeechansa fulate qajeelshu irko aannota Kalaa Abrahaam Maarshaalohu huwachishino.
Qajeelshuno, albillicho qoqqowu giddo noo baalunku woraddaranna quchumu gashshooti massagaanora hattono baalante miillara hoodinse uynannita egensiisino.
Bakkalcho Sadaasa 13, 2015 M.D Hamuse
