Amsaalu Felleqe
Addis Ababa:- Tigirayete qoqowira sa’u lame dirrara murame keeshshinoha rosanna rosiisate harinsho wirro aantanno onte agannara wo’munni wo’ma hanafisiisate loonsanni hee’noonnita Rosu ministere egensiissu. Rosu ministerera Rosu safote latishshinna owaante deeske sooreessi kalaa Daawit Azzene IItophiyu pireesete uurrinshara xawisino garinni; olu kae keeshshino qooxeessuwara rosu murame keeshshate qarri xaadirono Tigirayete qoqqowira kayinni sa’u lame dirrara rosu wo’mankawa murame keeshshino.
Kaino oli korkaatinni rosu tantanono diigantinoha ikkanna mashalaqqenna tajubba soorri’rate lowonta qarramme keeshshinoonnita kulinohu kalaa Daawiti; ikkirono, rosu loosi murama noosikki daafira handaarunni loossanno bissanni ledo qinaawatenni rosu looso hanafisiisa dandiisiissanno mixo amandoonni.
Aantanno onte agannarano qoqqowoho wo’munni wo’ma rosanna rosiisate loossa hanafisiisate balaxote qixxaawo assinanni hee’noonni yiino. Qoqqowoho rosu biirono diigantinoha ikkanna mannu jiro tantana; diigantino rosi minna wirro gatamaranna rosanna rosiisate ikkannore wonshate looso loonsannita kulinohu kalaa Daawit; olu korkaatinni diigantinore rosu uurrinshuwa gatamarrannire badatenni rosanna rosiisate injeessinanni yiino.
Kalaa Daawiti xawishshi garinni; rosu amanyooti qixxaawonna rosu loosira hasiisannore shiqishate loosino illacha tungoonniho. Alaxo uynannihu kayinni rosu amanyoote woyyeessateeti. Korkaatuno, rosaano olu korkaatinni rosa dandaa hoogansanni bacu qarri xaadino. Ikkinohura, rosaano noowa rosu kifile deerra seekkite affe aananno rosu kifilera sa’anno gede dandiisiisannoha rosu amanyoote diriirsinanni yiino.
Ledoteno, haaru rosu budi garinni rosaano rosa dandiitanno ikkito kalaqate qixxaawo assinannita kaysinohu sooreessu; rosanna rosiisate horonsi’nanniri shiqisho ragaannino maxaaffa qixxeessanna batinse shiqishate looso loonsannita huwachishino. Tigirayete qoqqowira rosanna rosiisate loosi hanafamanno yannarano wolootta qoqqowubbanni baxxino garinni ikkinota coyi’rinohu kalaa Daawit; rosaano, rosiisaanonna rosaanote maate tii’’insa rosoho qixxaawinoha ikkanno gede loonsannitano xawisino.
Balaxote qixxaawo millimillono hattonni harinsannitanna ledoteno rosaano, rosiisaanonna massagaano tiiu qixxaawo assitanno gede dandiisiisate looso loonsannitano xawinsoonni. Affaaretenna Amaaru qoqqowubbara boodu garinnino ikkiro rosaanote sagale shiqishate loosi Tigirayete qoqqowirano haja la’annonsari irko hasi’rannota qummeessinohu kalaa Daawiti; Tigirayeteno rosaano sagale shiqishate hallanya bissa; baara wido heedhannori Itophiyu ilama; hattono olu kainokki qooxeessuwara heedhanno ilama irko assitanno gede woshshatto assinoonni. Qoqqowoho nooha sakaalamino qarra tirate Wodiidi Afrikira Piritooriyaho harinsoonniti keeru sumiimme dancha dago kalaqqinota kaysinohu kalaa Daawiti; tenne dancha dago horonsi’ratenni rosanna rosiisate loossa busulsitanno loossa loosate addi illachuwa tungoonnitano qummeessino.
Bakkalcho Sadaasa 6/ 2015 M.D Hamuse
