Abrahaam Saamueel
Addis Ababa፦ Gobba diigannohanna ilama shaannoha Ikkinoha muishsha effidhe gibbanno ilama kalaqate baalunku dagoomi kifile qeechasi fula noosita Amma`note Annuwi woshshatto assitino.
Itophiyu Pireesete Uurrinsha ledo keeshsho assitinori Itophiyu amma`note annuwi uurrinsha Songo Keeru Gatamarshi Biddishshi Laynki Sooreessinna Wongeelaawuyaanete Kiristinnu Amma`no Rosiisaanchi Kalaa Adaane Dechaasi coyi’rino garinni; buxichu holge mulqatenni gobba diigannoha muishsha gargara mittu mittunku qeechaati.
Gobbanna daga gawajjannoha muishshanna bainchu assooti looso ilamate wodanira eanno gede assate amma`note uurrinsha, dancha fajjo uurrinsha, mootimmatenna hallanya uurrinsha hattono Dagoomi bissa xaphoomunni baalunkura qeechu noosi yiino.
Muishshunna bainchu assooti amma`note uurrinsha rosiisanno garinni, horontanni adhamooshshu dinosi; effi`noonni assooteeti yiinohu kalaa Adaane; konne ikkinohura, muishsha effidhe gibbanno ilama kalaqate assinanni wo`naalshi jalli assine agurranniha ikkinokkita xawisno.
Kalaa Adaane xawishshi garinni; muishshu haammata daga aana woxenna wolere uyne adha calla assine adhinirono; Manchu hedosinninna aanno owaantenni muishshanna baincho assoote loosara dandaanno.
Ikkollana, duucha doogo afi`rinoha konne muishshu assoote hunatenna ajishate hananfoonni millimillo mootimmate qeecha calla ikkikkinni, baalunku qeecha ikkinota huwachiisha hasiissannota buuxisino.
Kalaa Adaane, muishsha gargara mini maate miillanni hananfanniha ikkanna, farcote uurrinshanni kayinni irkisama hasiissanno hajooti. Mini maate oosonsa muishshunni co`o yitinota ikkite lophitanno gede assa noonsata qummeessino.
Farcote bissa qolte seera sa`enna tayse ha`rannoha woleho rosicho aanno garinni qorichishshanni insano qoodansa fula noonsa yiino. Itophiyu Isiliminnu Amma`no Xaphoomu Amaale Mini Loosu Harisaanchi miilinna Itophiyu Amma`note Uurrinsha Songora Laynki Boordete Gambisaanchi Sheehi Abdulihamid isi widoonni; Itophiyu Aliyye ragi ola sumiimmetenni jeefo afi`ranno gede assitu gedensaanni mittimmatenni muishsha hunatenna ajishate hananfoonni millimillo ninkeno jawaachinsheemmote yiino.
Tenne millimillo giddo beeqqaano ikkanna, muishsha effi`ra danchate yiinohu Sheehi Abdulihamid; amma`note annuwi muishsha effi`ratenni hala`lado looso loosa hasiisanansaha nafa ikkiro, kayinni illete leellino looso loossanna dila`noonni yiino.
Konnira, amma`note uurrinsha harunsitannonsa dagara muishshu bunshenna gawajjo rosiisa hasiissannonsata ledino. Sheehi Abdulihamid, muishshu assootinni beeqqaano ikkitinori gobba massagate dhuki dinonsa. Hiikku massagaanchino afi`ranno eo hiikkiinni ikkitinorono qoleno maa loosinorono afa hasiissanno. Kunino, gobba moorunni gatisate kaa`lanno.
Daga caaceessitinorenna muishshunni angansa xurtinore muishshu beeqqaano, gaamonna hallanyoota la`anno bissara reqecci assatenni gobbate lophora agaraancho ikka hasiissannota Amma`note Annuwi woshshatto assitino.
Bakkalcho Sadaasa 6/ 2015 M.D Hamuse
