Qiddist Gezaheny
Addis Ababa:- Federaalete mootimmanna HWHT mereero assinoonniti keeru sumiimme Itophiyu qeelaanchimma buuxissinota ikkasenni sumiimmete gumulora hananfoonni millimmo kaajjisha hasiissanno gede uurrinsha amandoonnita Jireenyu paarte mereershu komite miilla coyidhu.
Shoole barrubbara babbaxxitino hajubba aana hasaabbinori Jireenyu parte mereershu komite uurrinshu gambooshshi jeefamino. Jireenyu paarte mereershu komite ‘’Dhuka Gumunni Jifo Seyootenni’’ yaanno massagote qaalinni harissino uurrinshu gambooshshi aana babbaxxitino gobboomunna yannate hajubba aana hasaabbe aantete faasho wortino.
Mereershu komite balaxote illacha assitino hajubba mereerinni gobbate keeri umiho. Mootimmatenna HWHT mereero assi noonni keeru sumiimme gumulora murci’raanchimmatenni loonsanni hee’noonnita xawissinoti Jireenyu paarte mereershu komite miilla; keeru sumiimme gobbate keeru gatamarshira qeechise luphiima ikkasinni sumiimmete gumulora hananfoonni millimmo kaajjisha hasiissannota kayissino. Tigirayete qoqqowo wirro qolle gatamaratenna uurrisate aana annimmatenni loosa hasiissannota hasaawansa kayinsoonni.
Hattono cancishaano Shene gaamo yanna yannantenni addi addi gano iillishshanni afantannota xawissinori miilla; mootimma keeru doorsha harunsitanni keeshshiturono seera agarsiisate gadachantannota coyidhino. Qarra sufotenni tirate loossannotano egensiissino. Mootimma wo’mante gobbate qooxeessubbara ammansiisanno keere abbate sharro assitanni keeshshitinota kayissannori mereershu komite miilla; cancishaano Shene gaamo techono hunote assootensa suffe afantannota xawissino.
Gaamo Itophiyu diinna ikkansanni halamme gargadha hasiissannotanna konne qarra sufotenni tira hasiissannota miilla coyidhino. Mootimma illachise Aliyye gobbate kifilera noo olinni ikkasinni Shene labbinori giwaano poletiku wolqa qansootu keerenna barru barrunku heeshsho daafatenna umonsa halashshate kaayyo afiransa kultino.
Keeru sumiimme mittono ikko wole widoonni keere hunate qodhitino bissa konninni roso adhite tini doogo gawajjitannota ikkase huwatte dagguro danchaho yitannori miilla; kuni ikka hoogiro kayinni Shene gaamo aana rosiissanno qaafo adhinanni; korkaatuno, mootimma qansootu keere agarsiisate gadacho noose daafira yitino. Mootimma hiittenne xa’mono keeru doogonni tirtanno gede murcidhino uurrinsha amaddino yitinnori miilla; keeru doogo gobbaanni assinannihu hiikku doorshino gara ikkinokkita huwata hasiissannota duudhe xawissino.
Bakkalcho Sadaasa 6/ 2015 M.D Hamuse
