Qoqqowoho Sai Diro Investimentete Handaarinni 9.2 Biliyoone Birra Kaapitaale Borreessiinsoonni

-464 Investimentete Fajjo Adhite Loosu Giddora E’inokkire Harunsine Fajjonsa Hoolate Qaafo Adhinoonni

 Amsaalu Felleqe

Addis Ababa:- Sidaamu qoqqowira inves­timentete handaarinni sai 2014M.D calla 9.2 biliyoone birri kaapitaale borreessiisa dandiinoonnita qoqqowu Investimentete komishiine egensiissu.

Qoqqowu investimentete komishiine komishiinere kalaa Zennebe Leggese It­ophiyu pireesete uurrinshara xawisino garinni; Sidaami giddo ivestimentete handaari millimmo hananfinkunni 1986M.D– 2013M.D geeshsha 26 dirra giddo 3.2 biliyoone kaapitaale calla bor­reessinsoonniha ikkanna; sai 2014M.D calla 7.3 biliyoone birri kaapitaale bor­reessiisa dandiinoonnita egensiisino. Tay­ixeha lendanni woyte 9.2 Biliyoone birra borreessiisa dandiinoonni.

Sidaamu giddo investimentete millimil­lonna hasatto yanna yannantenni lexxi­tanni dagginota kulinohu kalaa Zennebe; babbaxxitino investimentete handaarran ni dureeyye bobbakkanni afantanno yiino. Qoqqowoho Agiro industirete paarkera eo ikkannori duuchu gari latishshi injoo nootano xawisino. Sidaami giddo noota investimentetenna industirete injoo egensiisate ragaannino komishiine hala’lado loossa loosatenni handaarunni woyyaawa guma borreessiisa dandiinoonnitano coyi’rino.

Qoqqowoho industirete handaara calla ikkikkinni owaantete handaarinnino jawaata loossa noota xawisino. Amandoonnihu 2015M.D xaa geeshsha loonsoonni loossannino investimentete handaarinni sai sasu aganira 1.4 biliyoone birra kaapitaale borreessiisa dandiinoonnita qummeessino. Investimentenna industirra hala’litu bikkinni qooxeessu dagoomira loosu kaayyo kalaqateno ikko laalchimma lossate hattono gobbaydi woxu soorro abbate noonsa qeechi luphiima ikkinotano huwachishino.

Qoqqowoho industirete handaarinni bobbakkanno investimentuwara tayxe dirinni 20 kume ale wedelli loosu kaayyo afidhanno injo kalanqoonnita kulinohu kalaa Zennebe; muli yanna giddo deerru deerrunkunni babbaxxitino handaarranni kakkayishshu loossa loosatenni wedella horaameeyye assate illachinshe lonsanni hee’noonnita qummeessino. Investimentete handaarranni bobbakkanno dureeyyeno qooxeessaho loosu kaayyo kalaqate ragaanni jawa qeecha fultara agarrannitanna xaa yannara Sidaami giddo investimentete millimillo jawaata ikkasenni xaa geeshsha la’noonniha dancha lawishsha kaajjishatenni albillichono handaara gummaamo assate illachinshoonnitano hattonni.

Ikkollana, qoqqowoho Investimentete su’minni fajjo fushshidhe baatto adhitu gedensaanni latissukkinni seeda dirrara huxxite wortinori sa’u yannara 19 investerooti fajjo angansanni haa’noonniha ikkanna; konni gobbaannino fajjo fushshidhe latissukkinni keeshshitinore 464 fajjo angansanni haa’ne sa’noonnita sooreessu egensiisino. Xaphoomunni 2,301 pirojekitubba giddonni 1,837 pirojekitubba loosu giddo hee’ransa bandoonniha ikkanna; 464 kayinni loosu giddo nookkire ikkansa bande qorqoratenni sheemaatensa diinge qaafo adhinoonnitano lede egensiisino

Bakkalcho Sadaasa 6/ 2015 M.D Hamuse