Qiddist Gezaheny
Addis Ababa:- Xaphoomu ministirchi Abiy Ahimed (Dr) haanju harumi millimmonni leellishino massagooshshira ‘Afriku Albisa Massagooshshi’ baraarsha adhino.
‘’Afrika, Kalqoomu Millimmo Rahisaanchimma’’ yaanno massagote qaalinni ‘American Academy of Achievement’ na ‘Global Hope Coalition’ yaamantino uurrinshuwa Waashingiten Diisira mitteenni qixxeessitino addi qixxaawo aana Xaphoomu ministirchi Abiy Ahimed haanju harumi millimmo lainohunni leellishino massagooshshira ‘Afriku Albisa
Massagooshshi’ baraarsha adhino. Xaphoomu ministirchi Abiy dagoomittete qoolisi aana baraarsha adhinota xawise; aleenni xawinsiri lamenti konne baraarsha qixxeessitu uurrinshuwa Afriku aana roduuwimmate angansa diriirsansanninna Afriku gummaamo looso ikkinoha Itophiyu haanju harumi afansha aansanni galatino. Kalqe diilallote gade soorronni lowohunni qarrantanni no yiinohu Xaphoomu ministirchi; Itophiyuno tirote aana illachishshe loossanni afantannota xawisino.
Shoolu dirinni haanju harumi millimmo wo’mante gobbate kifillanni 25 Miliyoone Itophiyu daga beeqqite 25 Biliyoone chiginye kaassinotano lede xawisino. Itophiyu haanju harumi mixo Amaazooninni aante lowo geeshsha hala’lado dubbu latishshinna dubbo wirro qolle latisate qixxaawo ikkase kaysatenni; Itophiyu chiginyete kaashshinna dubbo wirro qolle latisate loosinni ledote 700 kume hektaare ale ikkitannori batinye lubbuwa jironna kaarbenetenni jiroo’mitinore kalaqamu dubbo sufotenninna beeqqisiisaancho dubbu gashshooti mixonni latissanni noota xawisino.
Haanju harumi loosi kakkaooshshi amandoonni Awuropu kiiro 2022 bowiranni daynota xawise; gobboomunniha haanju bude assa dandiinoonnitanna chiginyete xaawubba kiiro 121 kume ale iillinshoonnita hattono 750 kume ale ikkanno meentinna wedellira loosu kaayyo kalaqatenni 1.3 Biliyoone Itophiyu birra eo abbitanni noota qummeessino. Chiginyuwa qachu gobbuwa iillishatenni qooxeessu mittoo’manna danna tayisse sainoha qooxeessu gashshoote kaajjishate loonsanni hee’noonnita coyi’rino.
Gobbate gede sainoha la’neemmo hincilaallonna misilleemmo doogo babbaxxitara dandiitanno yiinohu Xaphoomu ministirchi; oosonkenni noonke hexxonninna pilaaneetenke aana kayinni baalunku mittoho yiino. Itophiyu 2011M.D haanju harumi mixo hanafisiissu woyte shoole dirra giddo 20 Biliyoone chiggiye kaasate mixidhinoti qaangannite.
Ikkeennano, kulloonni dirra giddo wo’mante gobbate kifillara 25 Biliyoone chigginye kaasatenni shoolu diri mixose gumulsidhino. Konninnino, diilallote gade soorro gatisatenna dubbo wirro qolle latisate fultino qeechira kalqete deerrinni afansha afidhino yaanni Xaphoomu ministirchi borro mini odeessino. Xaphoomu ministirchi Abiy Ahimed tenne lamala giddo hananfoonni Afrikunna Ameeriku gutu gambooshshi aana beeqqate Waashingiten Diisi Ha’rinoti qaangannite.
Bakkalcho Sadaasa 6/ 2015 M.D Hamuse
