Hawadu fuleenna arru e”anno woyte diilallote akati kiphamannohura haammatu manni gashu dhibbira reqeccishamanno. Anfummonte gede ganshu yanna hanaffannohu birra aganinni ikkanna onkoleessu agani geeshshano sufaranna keeshshara dandaanno.
Ganshu taraawanno xisso ikkanna foollanni bisi xissooti. Sanotenni, kokketenni hattono mito mito woyte shombo amaddanno influweeza vayresenni kalaqamanno. Maccate infeekishiinna woy bakteeriyunni shombu xisso labbino qarrubba iillisharano dandaanno.
Kuni ganshu dhibbi haammatta amade mito mito ayirritanno xissonni shetise sa“irono, wolootta uurra ofolla ho`le daallasu aana tugensa gawajjinonsa mannootino no.
Ganshu Dhibbi Malaatta
• Luphiima iibbabbo
• Kaajjado buusano
• Qiijajjisha
• Mikitate xisso
• Badhete xisso
• Sagalete hasatto aja
• Umu damuume
• Daafuro
• Kokkete xisso
• Sandiiddira
• Sanote beewa
• Foo`late qarra
• Godowa fushshanna tushshiisha roorenkanni qaaqquullu aana rosaminoho
Qidduus phauloosi miliniyeem hospitaalenna meedikaalete kolleejjera kaa`laanchu piroofeeserchinna qaaqquullu xagisaancho ikkinohu Dr Faasiil Membere, Itophiyaho haammatu manni konni ganshinni amadamannohu qorophote anje kainohunni ikkinota coyi`ranno.
Ganshu Dhibba Gargadhinanni Doogga
Aneneetonna wolootta ganshu dhibbinni hiitto agara dandeemmo yitannota annu annunkunni qoropho assa noosi. Qarunni ganshu dhibba gargadhate baalunkunni woyyitino doogo diru tuqa ganshu kittiwaate adhate. Ganshu kittiwaatta qole ganshu ledo amadisiisantinno dhibbuwanna iillishshanno qarrubba ajishate kaa`litanno. Amadammiha ikkirono kaajjannokki gede assate kaa`lara dandaanno.
Qoleno rosu minira hadhanno qaaqquulli wolootta qaaqquulliwiinni woy rosaanotewiinni konne gansho adhite minira daggannokki gede jawa qoropho assa hasiissanno.
• Tenne yannara maaske horonsi’ra
• Anga garunni hayishshira
• Ganshunni amadamino manni ledo kikkisama hooganna qoropho assa
• Hanxishshidhinanninna buussinanni woyte afoonna sano garunni diwa
• Qarqaru co`ichimma agara
• Iibbinore horonsira
Osootenna Qaaqquulleho Mini Giddo Assinanni Xagisa
• Maxine noosi gammuutino waayinni sanonsa co`isa
• Iibbabbo hooltanno xagga aa
• Iibbinoricho aga
• Co`immansa agara
• Ledote du`namaano adhitanno gede assa
Konni albaanni ganchunni amadantino yanna qaaggannoti saga`late amanyooti ogeette sheef Addis Alem Bizuayyehu; bisinke togoo dani dhibbira reqecci yaannohu woy reqecci yii gedensaanni ayirritanno xissonna gawajjo iillitannosihu dhibba gargadhate dhuki kaajjikkiinni woy wolqa hooganno woyte ikkinota coyidhanno.
Bisunniha dhibba gargadhate dhuka lossate qole aye woyte akaakiltenna laalo saga`la qara doorsha ikkinotanna tini yanna abbitanno dhibbubbara shotu garinni anga aa hoogate kaa`litanno yitanno.
Ganshunni amadantinori qole akaakiltete Waco, shalaala, seliixe, lawuze, nuuge labbino qiwaatete gidubba iibbabborichi ledo adha konni dhibbinni rahotenni hurate kaa`litanno.
Abbebech Maatewoos
Bakkalcho Bocaasa 29, 2015 M.D
