Sululta:-Tsere Mussinnu sharro aye woyteno hasaawunni ikkikkinni loosunni qaafo adha hasi`rannota xawinsi. Afiriku Massagaano Lhiqetete Akkaadaame Tsere Mussinnu barra ayrrissino.
Afiriku Massagaano Fullankete Akkaadaame kalqoomunni 19ki gobboomunni 18ki yannara ayirrinsanniha Tsere Mussinnu barra “Mussinna sharrama loosunniiti” yaanno uminni sa`u Maakisanyo soodo addi addi huwanyo uynanni qixxaawonni ayirrinse sa`noonni. Mussinnu gobbate miinja ittisannoha ikkasinni sharro albihunni roorte hasaawunni ikkikkinni loosunni qaafo adha hasiissannota caakkeessinoonni.
Akkadaamete Akatunna Tsere Mussinnu Dayrektoreete Dukko Almaazi Mokkoniiniti shiqishshinno borronni, Itophiyaho mussinunna bainchu assooti rumuxxanni daynota kulte, kuni gobbate lophonna jireenyu aana guffa kalaqinota xawissino.
Afi`ni battalara baalate mussinnu baincho assoote ikkinota, iillishanna gawajjo calla lallananni, danchu gashshooti qarra ikke keeshshinoha mussinna huna didandiinanni yitino.
Albinni roore Tsere Mussinnu sharro hasaawunni sa`ne loosunni qaafo adha noota xawissinoti Dayrektercho, jawu qeechi noonsari hajo la`annonsa daga baalanti qeechansa fula noota xawissino.
Dayrektercho, hasaawunni sa`ne tajetenna egennote aana kaima assine sharro loosu aana leellisha hasiissannota, mussinunna bainchu assoote badatenni, reqeci assatenni, hattono, akatu hornya gatamaratenni latishshunna danchu gashshooti baalaamo ikkinoha mussinna rumushshosi buqqise hunate baalunku qeechasi fula hasiissanno yite xawissino.
Dayrekterchote xawishshi garinni, mussinna ittisate hanafote millimillo heedhurono loosaminohunni loonsoonnikkihu bati`ranno. Albiillicho, jawa sharronna qinaabbino sharro assa hoongiro mussinnu bidhatto yanna yannatenni lexxanni haranno gede kaayyo kalaqanno.
Uurrinshate xanbenna xa`mamooshshu looso diriirsate aana foonqe noota, dagate beeqqono ikkado ikkitinokkihura, hajo la`annonsa bissa qinaawinno garinni mussinnu aana qaafo adha hooganna mooraanote akata garunni eemaramanno gede assa hooga Tsere Mussinnu loosi ikkado guma abbannokki gede assitino korkaatubba ikkitinota Dayrektercho buuxxissino.
Uurrinshu tantanonna loossa kaajjisha, akatoo`mete tiianna hornyun aana huwanyo aanna mussinna gargarate assinanni xiinxallo albillicho illachiinshe loonsannita huwachishino. Konnirano, mootummate uurrinsha massagaano, Siivikete maammarra, amma`note uurrinsha, Miidiyu, maate, rosu minnanna dagoomu uurrinsha mussinnu aana kaajishshe sharramatenni qeechansa fula noonsa yitino.
Akkaadamete Layinki Murrichi Dr Wondiyye assino hasaawinni, mussinnu gobbate baalaamo ikkinota kule, mootumma konne illachiishhse adhitanni noo qaafo danchate yiino.
Dr Wondiyye, mussinna huna qara ikkitinota xawise, mootumma konne adhitanni noo qaafo baalunku irkisa noonsatanna halante sharrama hasiissannota egensiisino. Akkaadaame, huwanyo kalaqatenni qeechaseno fultannota kulino.
Qinaawino garinni mooranna baincho assoote sharrama hasiissannota battalate beeqqaanono coydhino.
Akkaadaame, Tsere Mussinnu barri ledo, Koo/tee gawajjonna Xorre Xoqoli barrano addi addi pirogiraamenni ayirrisse sa`ino.
Abrahaam Saamueel
Bakkalcho Bocaasa 29, 2015 M.D
