Sidaamu qoqqowira tsyixe 283 kume toone ali isilanchimma agadhino buna dikkote shiqishate loonsanni hee’noonnita xawinsi.
Qoqqowu pirezidaantichi kalaa Dedta Lefsmohu yiino garinni;Sidaamu qoqqowira bunu baatto halashshatenninna laalchimma lossatenni loosidhe galtinori horaameeyyimma buuxisste loonsanni hee’noonni.
Xaa yannara qoqqowoho 160 kume hekitaare baatto bunu kaashshinni domboonnita qummeesse; woyyaawino laalcho aanno sircho kaasatenni loosidhe galtinori eo lossatenni heeshshonsa soorrate loosantanni noo loossa jawaachishshannote yiino.
Kalaa Dasti Ledamohunni massagantino jajjabba mootimmate biilto Bansanna Burru woradda bununni lattino gatta gaangaabbe towaattino
Loosidhe galtino daga laalchimmasi gudino buni lekka muratenninna buqqise haaroo kaasatenni assitanni afantanno harinsho jawaachishshannota ikkase kayisinohu pirezidaantichu;laalchimma leddanno loossa kaajjite suffannote coyi’rino.
Qoqqowu Irshunna kalaqamu jiro latishshi sooreessi kalaa Mesfiini Qarrehu isi widoonni;tayixe qoqqowoho 1.3 miliyoone kuntaala Buna gamba assinanni yine agarrannita xawise konninnino 283 toone hayishshamino shama bunanna 40 toone moola buna mereerimu dikkora shiqishate loonsanni hee’noonnita xawisino.
Sai diro gobboomu deerrinni 5ki buna soyaate deerrira noohu daayye Bansi Buni expoortete loosi qaru sooreessinna anni kalaa asaffi duukamohu yiino garinni; tenne uurrinsha hundaanni 2 kuminna 500 ali buna laashshitanno loosidhe galtino daga laashshitino buna qixxeessite gobbayidi dikkora shiqishshannota buuxisino.
Loosidhe galtino daga bunu kaashshinni kayisse xinqi’rate geeshsha noo harinsho hasiisanno garinni gumulsitanno gede hasiisanno qajeelsha uyinanninsatanna harunso assinanninsata buuxisino kalaa Asaffi.
Yaareed Geetaachew
Bakkalcho Bocaasa 29, 2015 M.D
