Gobbankera diru dirunkunni ayirrinsannihu dagatenna dagoomu barri dagoomu mereero mittimma kalaqate widoonni noosi qeechi luphiimaho ikkinota Sidaamu qoqqowi songaafitte dukko Faantaye Kebbedeti Xawissu.
Songaafitte baxxinohunni Bakkalcho Gaazeexi ledo assitino hasaawinni; dagatenna dagoomu barri badooshshenke biinfille assi’ne, mitte assitannonke hajo aana mittimmatenni illachinsheemmo gede jawaachishannonke barraati yitinno.
Konni daafira mittimmanna xaadooshshenke kaajjishshanno hedo amande lophonniwa reekkammeemmo gede babbadamanna mimmito xiiwa agurre mitte assitannonkenna gobbankeno mitte fooliishsho alba qolte reekkissanno hedo amande jawaata noonke yitinno.
Dagatenna dagoomu barri dagoomu mereero noo mittimmanna badooshshu giddo noo biinfille huwanteemmo gede kaayyo aanno ayyaana ikkasi qummi assitinnoti dukko Faantaye; dagatenna dagoomu barra agarre calla ikkikkinni wo’manka woyte Itophiyu keerenna mittimma kaajjishanno looso gumulatenni gobba sufisiisatenna hobbaatese agarsiisate qansichimmate qeechanke fula hasiissannonke yitanni sokkase sayissino.
Ledoteno assinoonniti keeru sumimme sufo noota ikkitanno gede baalunku konni gedensaanni keeru Ambaasaadderoota ikkine loosa noonke yitinnoti dukko Faantaye, Base basente keeru hala’lanno gede, roduu rodoosi shaannokki gede baalunku keereho sharrama noonke yitanni duudhe huwachishshino.
Ayyaanu keerunniha, dagatenna dagoomu mittimma kaajjishi’neemmoha, gobba konne ayyaana harunsite woyyaabbino fooliishshowa reekkantannohanna gobbanke keere agarsiisi’neemmo gede kaa’lannoha ikkanno gede noose halcho xawissino.
Qiddist Gezaheny
Bakkalcho Bocaasa 29, 2015 M.D
