Addis Ababa:- Gobboomu deerrinni hananfoonnihu mooranna baincho assoote sharramate loosi kaajje sufinota Sidaamu qoqqowi Tsere- mussinnu komishiine egensiissu.
Qoqqowu Tsere-mussinnu komishiine laynki komishiineritte Zelaalem Lamma Itophiyu pireesete uurrinshara xawissino garinni; gobboomu deerrinni hananfoonniha mooranna baincho assoote gargarate gaadi qoqqowoho kaajje sufino.
Mussinna gargarate gaado dagoomunni ledo halamatenni sharramate deerru deerrunkunni hala’lado looso loonsanni hee’noonnitano egensiissino.
Qoqqowoho woraddatenna olluubbate tantano geeshsha dagoomaho huwanyoote kalaqatenni; ‘’Mussinnu Gargarooshshe Loosunni Leellinsho’’ yaanno massagote qaalinni hala’lado loossa loonsanni hee’noonni.
Mooranna baincho assoote gargarate loossa dagatenni ledo halamme loosa hasiissanno yitinoti laynki komishiineritte dukko Zelaalem; dagano halantanno gede woshshatto assitino.
Mussinnunna mooru kalaqamisinni gobbate latishsha gufisannoho; gobbate latishshunna lophote harinsho qalxe amadannoha hattono keeru booraawanno gede korkaata ikkanno daafira gobbate keerinna latishshi gufi’rannokki gede assate balanxe konne baincho assoote kaajjillunni sharrama hasiissannota egensiissino.
Qoqqowohono amandoonnihu 2015M.D umikki bocu boci diri giddo mussinnunni huluullammoonnire ga’labbotenna seeru bissanni ledo qinaawatenni xaphoomunni 26 huluullamaano seerunni qorichishantanno gede assinoonni yitino.
Konne calla ikkikkinni woxunnino xaphoomunni 5.4 miliyoone ali birra daganna mootimmate jiro hafanfartannota hattono mittu woradira calla 456 kaare meetire baatto seerimale amadantinota gatisa dandiinoonnita coyidhino.
Laynki boci dirirano handaarunni hala’ladda loossa gumullanni hee’noonnita qummeessitinoti dukko Zelaalem; odiitetenni iillinoonnirenna hafanfarretenni gatinsoonni woxinna jajji noota kultino.
Amadisiisseno, mussinnunna mooru hajo gargara mitticho uurrinshanni calla sharramme guma abbinannita ikkitukkinni baalanti massagaano, ogeeyyenna dagoomuno mussinnu iillishanno gawajjo huwatatenni bainchu assootinni angansa noore qummeessatenni gutunni sharramatenni mussinna garagara hasiissannotano amadisiisse sokkase sayissino.
Sidaamu qoqqowi Tsere-mussinnu komishiine; ‘’Mussinnu Gargarooshshe Loosunni Leellinsho!’’ yaanno massagote qaalinni 2015M.D 19ki kalqoomu Tesere-mussinnu barra ayirrisate amanyoote jeefote barra Alatta Wondi quchumira tenne lamalara harinsoonni.
Barete leelle hasaawa assinohu qoqqowu pirezidaantichi kalaa Desta Ledamo; mussinnu gobboomu deerrinni ikko kalqoomu deerrinni kalaqanno hekko luphiima ikkitinota coyi’re; xaa yannarano gobbankera rumuxxe keeshshinoha mooranna mussinna gargarate mootimma Qoqqowu deerrinni ikko Federaalete deerrinni gobbanna dagooma gawajjannoha baincho assoote sharramate jawa illacha tugatenni uurrinsha tantannoonnita qummeessino.
Bainchu assootira angansa noonsare mootimmate biilloonye amaddino bissa yanna yannantenni keennanni qaafo adhinanni hee’noonnita coyi’rinohu pirezidaantichu; dagano mootimmate waatira ikkite baincho assootenna moora sharrantanno gede sokkasi saysino.
Amsaalu Felleqe
Bakkalcho Bocaasa 29, 2015 M.D
