Addisi Ababa:- Itophiyu dagara injiitannotanna gutunnita ikkitino gobba kalaqate baalanti fullahaano uminsa qeecha fula noonsata Dr Abiy Ahimed qaagiissino. Sa`u Sanyote barra, “Itophiyu jawimmara fullahaanote qeechi” yaanno uminni gobbate fullahaano ledo hasaawu battala Addis Ababaho harinsoonni.
Hasaawu battala aana afaminohu IFDR Xaphoomu Ministerchi Dr Abiy Ahimed xawissanni, mootimma fullahaanote ledo loossannohunna fullahaano mootimmatenni ledo loossannohu gobbate gutu hororaati. Ikkinohura, gutu gobba ikkitinota Itophiyu gobba baalunkura injiitanno gede kalaqate fullahaanotewiinni duuchare agaranni.
Fullahaano gobbate polotiki duucha guffanni dukkisaminota huwatte, amanyootunni konne soorrate hasiissanno doogo harunsa noonsata xawisino.
“Itophiyu, baalunku ayirrineemmo gobba ikka noosi; baalunku ayirra hoongummoro ayino ayiirra didandaanno. Konnira, Itophiyu daga ikkinommori baalu, loonse, danfe afi`neemmo kaayyo afi`ra noonke. Kuni ikka hoogiro, gobba soorrama didandiitanno. Konnira, fullahaano qeechansa fula noonsa” yiino.
Battalate hasaawa assinohu Kotebe Yuniversite Pirezidaantichi Dr Birhaanemesqel Xannihu isi widoonni, fullahaano gobbate jawimma, keerenna dagoomu horo balaxiisse loosa hasiissannota qaagiissino.
Fullahaanonniti doogo babbaxitinota ikkiturono, gamba assine lendiro gobbate jireenya buuxissanota qummeessinohu Pirezidaantichu, konne qineessate dandiinannihu ayiinnino roorsine gobbate horo balaxiinsiro ikkinota coy`rino.
Dagoomu horo balaxiisa, mittimmatenna jawimmate kaima ikkinota huwata hasiissanno yiinohu Pirezidaantichu, fullahaano loossanno loosinni qeechansa fula noonsa yiino.
Addisi Ababu Saayinsetenna Tekinoolojete Yuniverisite Pirezidaantichi Dr Derejje Ingidihu uyno hedonni, Itophiyu jawimmara fullahaanote qeecha yitanno battala qixxeessa dancha ikkitinota xawisino.
Shiqqino kikkishu xiinxallonna hasaawu kaimi hedo aana fullahaanote qeechi woy qoodinsa Itophiyu jawimmara hattono Itophiyaho keerunna hobbaatu ikkano gede assate qeechinsa woffi yiinota leellishinota xawisa gara ikkitinota baalunku sumuu yinoommo hedooti yiino.
Uurrinshubbate, fullahaanote hasaawu kiwawenna hasaawu hedo fushshine hattono, battala halashshatenni fullahaano gobbate lophora, keerehonna keere buuxisate uminsa qeecha fultanno gede loonsannita qummeessino.
Hasaawu battala aana Rosu Ministerchi Birhaanu Naggihunna wolootu mootummate biilto hattono babbaxitino yuniversitenni dagginori fullahaano afantinoha ikkanna, battala qixxeessitinoti Kotebe Rosu Yuniversitenna Addisi Ababu Saayinsenna Tekinooloojete Yuniversite ledo qinaawatenni ikkinota anfoonni.
Abrahaam Saamueel
Bakkalcho Bocaasa 29, 2015 M.D
