Addis Ababa:- ‘’Itophiyu daganna dagoomu barri ayirrisamasi ayimmankenna danchummanke mimmitoho leellinshoommoho’’ yii; Sidaamu qoqqowi pirezidaantichi kalaa Desta Ledamo.
Daganna dagoomu barri woloottu roduuwu daga ledo roorenkanni egennammeemmoha ikkasinni; ayyaana biifinonna wosinnate injiino garinni ayirrisate balaxote qixxaawo assinanni keeshshinoonniha ikkanna; 17ki Daganna dagoomu barra Federaaletenna qoqqowubbatenni daggino wosinna leeltinoha techo iibbino garinni Hawaasi quchumira ayirrinsoonni.
Barru Itophiyu daga mittimma buunxoonniha ikkasinni iibbino garinni ayirrinsoonniho.
Federaalete amanyooti meessaneete hattono gobba gutunni gashshate dandiisiisino yiinohu pirezidaantichu Desta; qansootu gutu hajononsa lainohunni Federaalete amanyootinni galtannohanna qooxeessinsara kayinni umonsa gashshitanno wolapho afidhinoha ikkasi xawisino.
Qoqqowubbate mereero hananfoonnihu daga mimmitunni ledo xaadisatenna egensiisate loosi kaajje sufanno gede assatenni dimokiraasete mittimma roorenkanni bowirsatenni dagate mittimma kaajjishate loosi albinni roore kaajjinshe sufisa hasiissannotano hattonni.
Ayyaana ayirrisate Hawaasi quchuma daggino wosinna quchumaho millisatenni boohaartanni towaanyo assite budenna balchoomansano Masiqalu gudumaalira dagate leellishshinotano afate dandiinoonni.
Sidaamu qoqqowi qixxeessonni ayirrinsoonnihu tayxehu 17ki daganna dagoomu barri ayyaanira Federaaletenna qoqqowubbate luphiima mootimmate loosu massagaanono leeltino.
Ayyaana ayirrisate babbaxxitino qooxeessubbanni qoqqowo daggino wosinna Hawaasi quchuminna qooxeessu dagoomi Sidaamu daga wosina adhate amanyootinni koyinsoonni.
Tayxehu daganna dagoomu barri ayyaani Itophiyu xaaddinose jiffa qeelte sa’’atenni babbaxxitino latishshu loossa gumultanni afantanno yannara ayirrisamasi kulinohu pirezidaantichu; Hawaasi quchumira ayirrinsoonni ayyaani Itophiyu daga, dagoominna manni budenna balchooma mimmitoho leellinshoonniha ikkasino coyi’rino.
Amsaalu Felleqe
Bakkalcho Bocaasa 29, 2015 M.D
