Addis Ababa:- Moorunna danchu gashshooti qarrubba tirate kaajjado xa`mamooshshu amanyoote kalaqa hasiissanno yaatenni miinju rosu goli rosiisaanchi coyi`ri.
Haromaayu yuniverisitera miinju rosu goli rosiisaanchi kalaa Fireezer Xilahun coyi`rino garinni; gobbate gede babbaxxitino handaarraranna quchummate moorunna danchu gashshooti qarrubba hala`litanni no.
Qarrubba hala`lite gobbatenna qansootise aana gawajjo iillishansara albaanni uurrisa hasiissanno yinohu kalaa Fireezer; uurrisa hoongiro kayinni baalunku mine harancho yanna giddo ganganatenni sa”e assootubba baalunkuwa qara e”ote bue doorshi gede la”amatenni baalunku mooru widira bobbahanno gede assanno yino.
Rosiisaanchu Fireezeri xawishshi garinni; moorunna danchu gashshooti qarrubba mootimmatenninna dagoomu ha`lamanni uurra hoogguro aantete loosu hoongi kiiro luphiima garinni lexxanno; gobbate miinji lophono worrorritte dirranno gede assanno. Gobbayidi dureeyye, investerootunna turistootu gobbate giddora daggannokki gede xiiwo assatennino aleenni dagginoreno ikkiro bobbakkino loosu handaarinni hobbaatu macciishshamannonsakki gede assannonsa.
Gobbate giddoti latisaano dureeyyeno latisate mooraalenna hasatto heedhannonsakki gede assanno yinohu miinju rosu goli rosiisaanchi; latisa hanaffinorino latishshu loosonsa aguratenni wolootta mulqaano bissa gede seerimale doogonni woxu hasattonsa wonshate wo`naaltanno gede kakkaysannonsata coyi`rino.
Qarrubba tirate qarrubbate korkaatta afanna mooshshinanni doogo qixxeessa hasiissanno yinohu rosiisaanchu; loosu kalaqo aana ha`lama, baattote shiqisho aana loosa, seerunni amadantino mulqaano aana adhinannita seejjote qaafo rosiissannotanna kaajjado assa, hattono rakkino mu`ro saysa hasiissannotano qummi assino.
Kuni ikkawokki gede mitu mitu akatoomu xe”inonsari ga`labbotenna keeru ayyirrisiisaano, massagaanono lede konninni bobbakkino bissa ledo mitteenni horonsirate akati heerasinni looso ayirranno gede assannotano dimaaxino.
Tenne xaadu goodo linxetenni xiinxallatenni, aantete qara qara quchumma mooraanote tuuta ikkitannokki gede loosatenni mininni rosu uurrinshuwa geeshsha akatoomu roso aa, miidiyu uurrinshuwano dagoomu baqqi yaanno gede rosiisatenna huwachishate looso loosa agarantannonsata egensiisino.
Ha`lamatenni qarrubba tirama hoogguro aantete kalaqantara dandiitanno gawajjo xa noohunni ero ikkitanno yaannohu rosiisaanchu Fireezeri; kuni ikkasira albaanni kaajjado seejjote qaafo adhatenni qarra rumushshisinni tira hasiissannota hedisiisino.
Mooru qarri jawoo`meenna xa gatinohu minunni mine ha`nanni moora callaati yinohu rosiisaanchu; qarru konni aleenni hariro mannu hasi`ranno bikkinni latise, loosi`re, laashsheenna daafure ita dandaannokki gede hoolasinnino aleenni mooraanote dhuki lophe mootimmate hekkisamaacho wolqa ikkara dandaanno yino.
Keerunna ga`labbote bissa ledo noo foonqubba taashsha hasiissanno yinohu rosiisaanchu; moortenna seeru hundaanni hossino bissa amadantuhu gedensaanni harancho yanna giddo fushshineennansa wirro mooru aana bobbakke leeltanno akati noona, tenne shaqqitinota seeru seejjo biddi assine kaajjado qaafo adhinanni amanyoote kalaqa hasiissannono yino.
Qarrubba tirate jaddo loosatenna loosiisate aana bobbakkinonna jaddote giddo cuuante afantinori aana ayirritannonna rosiissanno seejjote qaafo adhinara hasiisanno yinohu rosiisaanchu; togo assa hoongiro gobbate gede baasa mitiimmubba giddoonni sa”anni nooha gobbate lopho lowontanni gawajjanno yino.
Abbebech Maatewoos
Bakkalcho Bocaasa 22, 2015 M.D
