Addis Ababa:- Mootimmanna HWHT assitinota keeru sumiimme harunsite Tigirayete qoqqowo 32 kume Metrik Toone sagalete gidenna 360 kume liitire ali nadaaje iillinshoonnita Itophiyu Danote Bidhatto Massago Komishiine egensiissu.
Komishiinete komishinerchi shiferraw Teklemaariyaami; mootimma keeru sumiimme kaima assatenni mannihimmate irkora Tigirayete qoqqowo iillishshanni afantannota coyi’rino.
Konninnino Shoole ragaanni Meqelenna Shire horophillu fooliishshi’ranno base widoonni kaa’looshshe iillinshanni hee’noonni yiino.
Piritooriyu sumiimme gedensaanni Bocaasa 16/2015M.D geeshsha mootimma umise dhukinni 13 kume Toone gummate gidenna dhaabbanno sagalla; kaa’looshshu uurrinshuwa widoonni kayinni 19 kume Meetrik Toone sagalete gide Tigirayete qoqqowo sonkoonnita lede xawisino.
Sa’u lamala giddo qoqqowo sonkoonnihu mannihimmate irko 2 Miliyoone ale ikkitannore qoqqowu daga horonsiraano assannoho yiino.
Sagalete shiqisho gobbaanni Tigirayete qoqqowo lede Aliyye Itophiyira mannihimmate irko hodhisate hossannota 360 kume liitire Nadaaje qoqqowo sonkoonnitano xawisino.
Mootimma luphiima xagganna xaginaatu uduunne, rosu minnaranna qooxeessu dagara, waanna co’imma agadhinanni uduunne iillishshanni afantannota huwachishinno.
Mannihimmate irko shiqishate loosi kaajje sufannota qummi asse; konnirano, halamaano bissa qansootu ledo qinaambe loonsanni hee’noonnita qummeessino.
Amaarunna Affaarete qoqqowubbara babbaxxitino qooxeessubbara kalaqantino gaancenni gawajjantino qansoota kaa’late mootimma assitanni noo sharronni gobbaanni dagoomu beeqqo jawaata ikkasi kule; kuni loosi kaajje sufanno gede xa’mino.
Qaensanni darantino qansoota qaensa qolle sufotenni uurrisate mootimma qineessitanno komite uurrisse loossanni afantannota coyi’rinohu komishiner Shiferrawu; uurrinshu owaante hanafisiisate qoteho qansootu rosantino heeshshonsawa higga geeshsha mannihimmate irko kaajjinshe sufate ikkado qixxaawo assinoonni yiino.
Mootimma jiro gamba assate gobbaanni kaa’looshshu uurrinshuwa dhuka horonsirate loossanni afantannota qummi asse; Itophiyu daganna qansootu mootimma olu korkaatinni gawajjantino qansoota irkisate assitanni noo sharro irkissanno gede xa’mino.
Qiddist Gezaheny
Bakkalcho Bocaasa 22, 2015 M.D
