Hawaasa:- Sidaamu Dagoomu Qoqqowi Mootimma Womaashshu Biiro istiriingete komite Qoqqowu giddo hallanya uurrinshuwa mootimmate ledo sheemaata e`e babbaxxitino latishsha loossinoha towaanyo assitino.
Qoqqowu Womaashshu Biiro Sooreessi Araarso Garramew (PhD) ni massagantinoti qoqqowu istiriingete komite hallanya uurrinshanni loosantinota latishshu pirojekite sa’u lamalara Hawaasa, Shabbadiinonna Yirgaalamete Quchummara towaanyo assitu gedensaanni Hawaasi quchumira torbitino.
Sooreessu Araarso Garremew (PhD) tenne yannara coyi’ranni; “Manna kaa’late mancho ikka callate” yitannoti dagoomu yaatto shooshanqenna lophote doogo leellishannote” yiino.
Qoqqowu mootimma ledo sheemaata e`e loossanni nooti hallanya uurrinshuwa kiiro 70 ale ikkitanota xawise Sooreessu; kuri uurrinshuwa qoqqowu giddo haammata latishsha loosatenninna angate anje korkaatinni irko hasiissannosare filte gamba assatenni jawaata looso loossinota buuxisino.
Mootimmannita ikkitinokki uurrinshuwa rosunni, fayyimmatenninna giwirinnunni hattono wedellunna meentu aana loossannota xawisinohu Araarso (PhD) ; tenne pirojekitera haammata womaashsha fulo assite loossinota egensiisino.
Womaashshu Biirohu Layinki Sooreessi Kalaa Kabbadi Kambaatihu isi widoonni; qoqqowu giddo afantannori hallanya uurrinshuwa bissa xa yannara 77 ikkitanno pirojekituwa loossanni noota kule; 2015M.D calla 1.5 biliyoone birra ale fulo assitinota coyi’rino.
Kuri uurrinshuwa ontu diri geeshsha calla qoqqowu giddo haammata latishshanna irkote looso loosate mixo amadde milli yitanni nootano coyi`rino.
Abrahaam Saamueel
Bakkalcho Bocaasa 22, 2015 M.D
