Addis Ababa:- Keeru hee’ra dagoomitte, poletikunna miinjunni dagooma horaameeyye assitannota Abeenezer Kaa’lotenna Lophote Maamarinna Kalqoomu Keeru Baanke ‘’Global Peace Bank’’ Safaanchinna Loosu Harisaanchi Kalaa Argaw Ayyele coyi’ri.
Keeru hajo duuchanka woyte; baxxinohunni, mootimmate deerrinni hasaawu illacha assineenna duuchante dagoomu bissa hasaawa dandiitanno garinni injeessiniro gobbate keeri geanno gede jawa qeecha fulanno yitanno ammano nooesitano coyi’ranno.
Gobboomu deerrinni hanafoonniti bayriidi kofattonna haanju haruminna wolootta jajjabba pirojekituwante gede keeru hajono jawa illacha uyne baalanka dagooma beeqqaano assa hasiissanno hajo ikka noose yiinohu kalaa Argaw; gobbate keere buuxisiisa dandiinannihu gutunni loonsiro ikkinota xawisino.
Olunni gawajjantannori ola hasidhannorenna kakkayissannore ikkitukkinni ola hasidhannokki mannaati; ola kayissannori qaccete heedhe irkissanna olu daafira heddinokkiri e’e gooffanno yiinohu kalaa Argaw; olunni amuwu, annuwu qaaqquullu hattono baalanti dagoomu bissa gawajjantannota kulino.
Keeru hoongenni ka’’anno olinni gobbanna dagoomu gawajjameenna kiirotenni shiimu manni horaameeyye ikkansa horonsidhino yaa dikkitino; Olu ayeerano elannokkihura dagano gobbano gatisate keere balaxisiisa hasiissanno yiino.
Ola kayinse sharrama hasiissannohu gobbaydi diini horre dayro bareendetenni gobbanna dagano gatisate olammanni ikkinnina; gobbate giddo roduuwu mereero ka’ino gaancenni ola kaysa kayinni digaraho. Keeru doogonni hasaambe qarrubba tirate harinsho rosicho assi’ra hasiisannotano egensiisino.
Baara wido heedhannori Itophiyu qansootinna ilama roorima gobbansa keere hasidhannore ikkansanni xaa geeshshano gobbate hasiisannore assatenni qeechansa fultanni nooha ikkanna; albillichono keeru daafira agarranninsa qeecha baala fultanno gede yawo aa hasiissannota qummeessino.
Giddoydi keerenna mittimma kaajjinshiro gobbaydinni keerenke boreessitara hasidhanno wolquwa hasatto toltannokki gede assa dandiinanni yiino.
Manchi beetti afuunni, amma’notenni, ilame lophino basenni babbaxxirono; mannihimmatenni hattono keerunna gobboomitte hajonni kayinni mittimmasi kaajjishi’ra noosi yaanno; kalaa Argaw.
Keeru hoogiro loosu, latishshu, rosa, lopho diheedhanno; keeru nookkiha gobba dige’anno; konnira duuchankare keeru doogonni huwatanna araarunni keere geisa hasiissanno.
Olunni tirfidhannori olu uduunni daddalaanooti yiinohu kalaa Argaw; keeru hajora balaxo uyniro gaancenna olaho illacha uynannikki daafira albanke latishshu widira qolatenni hasi’neemmo lopho widira reekkanma dandiineemmo yaanniiti kalaa Argaw lede coyi’rinohu.
Keeru ledo amadaminohunni babbaxxitino bissa beeqqisiisate kaayyo kalaqqanno qixxaawo,Wodiidi Raadoonenni ledo qinaawatenni keeru aana maltannonna faltanno qixxaawo dagate widoogge “Peace Global Baanke” mashalaqqe iillisha hanaffinotano qummeessino.
Amsaalu Felleqe
Bakkalcho Bocaasa 22, 2015 M.D
