Addis Ababa:- Tayxe arri yanna Qamadete latishshira hasiissanno 75 kume waa goshooshshanno motorra mereerinni xaa geeshsha 62 kume ale ikkitannori latishshaho qixxaabbinore ikkansa Gibrinnu Ministere xawissu.
Gibrinnu ministirchi kalaa Umer Huseeni Itophiyu Pireesete Uurrinshara xawisanni; tayxe gobbate gede arri Qamadete latishshira amandoonnita 1.3 Miliyoone Hekitaare baatto latisate mixo gumulsate 75 kume waa goshooshshanno motorra (Paampuwa) hasiissanno. Kuri giddonni xaa geeshsha 62 kume ale ikkitannoti latishshaho qoxxaabbino.
Gobbate deerrinni arri Qamadete latishshira hasiissannori 75 kume wayi paampuwa konni alba assinoonni kiironni 50 kume ikkitannori hee’ransa qummi asse; xaa geeshsha 62 kume ale way motorra latishshaho qixxeessinoonnitanna gattinoreno qoqqowubbatenna Gibrinnu Ministere widoonni hirre harancho yanna giddo shiqinshannita coyi’rino.
Xaa yannara way motorra ikkikkinni Yuuriyu harishsha shiqisho qarri xaadara dandaannota xawise; harishsha sharramme gobbayidinni eessine mixo gumulsate hasiissanno sharro assinanni yiino.
Tayxe arri gorsinni 1.3 Miliyoone Hekitaare baatto latisatenni 53 Miliyoone Kuntaala Qamade laashshate mixi’ne looso hananfoonnita kulinohu Ministirchu; kuri giddonni xaa geeshsha 680 kumi hektaare baatto arri gorsu Qamade latishshira qixxeessinoonnita qummeessino. Hektaaretenni mereerimunni 38 kuntaala Qamade latisa dandiinoommero 50 Miliyoone kauntaali ale Qamade laashsha dandiinannita xawisino.
Goyiretenni latinsoonnitanna arri gorsinni latinsannita lendeenna gobbate giddo hasatto wo’munni wo’ma dimbe mereerimunni 25 Miliyoone kuntaali ale ikkannoha ledote laalcho gobbaydi dikkora shiqishate qixxaawo assinanni hee’noonnita buuxisino.
Diru dirunkunni Qamade gobbaydinni eessineemmo woyte mittore coyidhinokki bissa techo Qamade dikko shiqinshammoraati yinanni woyte xiiwo kalaqate wo’naalansa gara ikkitinokkita kayisannohu Ministirchu; baalunku coyi aana foonqe hasa calla ikkikkinni meessiwiinni agarranni qeecha fullanni noo foonqe leellisha danchate; Togo assa dandiiniro gobba alba qolle qaafisate kaayyo hala’lado ikkitanno yiino.
Gobbate gede Qamadetenni; haanju haruminninna bunu laalchinni afi’noommo gumi aantino loossankera rosichoho yiinohu kalaa Umeri; sai diro arri Qamade latishshinni loonsoonni loosinni gobbayidinni e’anno Qamade gobba giddonni riqiwankenni 1 Biliyoone Doolaare ale gatisa dandiinoonnita huwachishino.
Sai 2014M.D 680 kume hekitaare baatto arri gorsinni latisa dandiinoonnita kayse; kunninnino 24.9 Miliyoone kuntaala Qamadete laalcho afi’noonnita egensiisino.
Qiddist Gezaheny
Bakkalcho Bocaasa 22, 2015 M.D
