Addis Ababa:- Itophiyu Jireenyu widira assitanno harinshora Interneete dancha kaayyo kalaqqannose yiino Xaphoomu ministirchi Abiy Ahimed (Dr). Itophiyaho Interneete horonsidhanno daga kiiro Ontu diri albaanni noowiinni 19 miliyoonenni xaa yannara 30 Miliyoone ale iillitinotano qummi assino.
Xaphoomu ministirchi Abiy Ahimed (Dr); tenne lamala giddo Halantino Mootimmuwa Uurrinsha Afriku Ikonomikete komishiine harira fannoonni 17ki kalqoomu mashalaqqete xaadooshshi gashshooti gambooshshi aana afame sayisino sokkanni; Itophiyu Interneetete iillo halashshatenna mashalaqqete xaadooshshi keeraanchimma agarsiisate widoonni batinye looso loossanni nooha ikkanna tenne harinsho aana handaaru, Jireenyise harinshora aana kalaqqanno dancha kaayyo mitte lophitanni noo gobba gede afamishsha uytanno.
Itophiyu dijitaalete tekinoloojenna Informeeshiinete handaarinni rakkino lopho abbitanni noota coyi’rinohu Xaphoomu ministirchi Abiyi; Interneetete owaante jiroo’mitino Itophiya kalaqate amandoonnita tonnu diri mixo gumulsate heedhannose kaayyo huwachishanno.
Dijitaalete yannara Interneetete horo jawa ikkase xawisannohu Xaphoomu ministirchi; hodhishshunni, gibrinnunna fayyimmate lopho aana handaaru noosi irko xawisino.
Xaphoomu ministirchi mashalaqqete xaadooshshi gashshooti gambooshshi aana Itophiyu ICTna Dijitaalete reekko hodhishsha bowirsatenni illete leeltinotanna gumulantara dandiitanno hedo qixxeessitanno gede eeggo yiino.
Afriku keeraanchimmasi agarantinohu mashalaqqete xaadooshshi gashshooti hee’rasera hasiisanno yinohu xaphoomu ministirchi; mashalaqqete xaadooshshi gashshooti kaajjado poolisenni irkisama hasiisannosita huwachishinno.
Itophiyu koroonunna wolootu mannu loosino qarrubbanni mitiimmate giddo noo yannara looso mashalaqqete xaadooshshinni harisa dandaase danchummatenni kayisinohu xaphoomu ministirchi; konni garinni handaaru sodhino mashalaqqe fincatenni gobba gawajjanni keeshshinotano kayisino.
Xaphoomu ministirchu dokter Abiyi; Interneete batinye danchummate coyubba heedhuserono sorote mashalaqqe halashshate widoonnino xiiwo kalaqqannota huwachishinno. Itophiyu sa’u Shoole dirra giddo taalo ikkitinokki mashalaqqe korkaatinni xiiwote giddoonni sainota xawisino.
Gobbate noota dagate kiiro mereersitinota Interneetete iillo lossate loossino loosinni batinye soorro daggino; Itophiyaho faranjootu 2017 nni 19 Miliyoone horonsiraano nooha ikkanna tini kiiro 2022 nni 30 Miliyoone ale iillitinota qummi assino.
Tenne lamala giddo Addis Abebu quchumira harinsanni hee’noonni 17ki mashalaqqete xaadooshshi gashshooti gambooshshi Interneetete ledo amadaminohunni daanno qarra tirate kaa’litannota tirote hedo aana hasaambannita ikkitanno yitanno hexxo noosita xaphoomu ministirchi dokter Abiy Ahimedihu xawisino.
Qiddist Gezaheny
Bakkalcho Bocaasa 22, 2015 M.D
