Addis Ababa:- 17ki Itophiyu dagatenna dagoomu ayyaana lainohunni babbaxxitino qoqqowubbanna Zoonnate riqiwamaano sokka sayissino.
Sidaamu qoqqowi pirezidaante kalaa Desta Ledamohu dagatenna dagoomu barra ayirrinseemmo woyte badooshshinkenni biinfe; mittimmankenni xambe Itophiyimmanke bowirsatenni ikka noosi yiino.
Itophiyu batinye daganna dagoomi gobba ikkasenni baalunku halamatenni tenne dhaggeeffachishshanno gobba sufisiisate uminsa qeecha fula noonsata sokkasinni lede huwachishino.
Qoqqowu amaale mini qara songaafitte dukko Faantaye Kebbede ise widoonni; dagatenna dagoomu barri dagooma mittoonsate qeechisi luphiimaho yite; ayyaanu Sidaamu daga uminsa qoqqowo safidhu kawa ayirrinsanniha ikkasinna gobbankera kalaqantino gaance keeru doogonni jeefantanno gede sumiimmete aana iillinoonni yannara ayirrisamasi baxxinoha assitinnosi korkaatta ikkansa xawissino.
Ayyaana ayirrinseemmo woyte rosantino harinshonni calla ikkikkinni mundee aatenna qarrantinore roduuwimmatenni kaa’latenni ikka noosita huwachishshino.
Wodiidi Qoqqowi Dagoomu Amaale Mini Songaafichi kalaa Lemma Gezume; Itophiyu daga addi addi budi, dhaggenna woga noonsa daga ikkansa coyi’re; Sidaamu qoqqowi babbaxxitinota gobboomu qixxaawo qixxeessanni afamannoha ikkasinni konne ayyaana garunni gumulannota noosi ammana xawisino.
Ledoteno, Wolayittu Zoone qaru gashshaanchi kalaa Aklilu Lamma; kuni barri Itophiyu daga budensanna balchoomansa xawoho fulte ayirrissanno gede safo tuginoha ikkasi kayse; fajjinoonni qoosso fajjantinokkihu gede diwante keeshshitino amanyooti soorrote mootimmanni soorraminota coyi’rino.
Sidaamunna Wolayittu dagara kaajjadonna keeshshitino mittimma noonsa dagaati yiinohu kalaa Aklilu; konneno Sidaamu daga Wolayittu daga diru soorronna woloottu ayyaanna aana leelte leellishshino yiino.
Dagoomittete xaadooshshi keeshshinoha ikkasi xawise; Sidaamunna Wolayittu daga mittoo’mitanno woyte Itophiyu jawaatinoha ikkanno yiino. Wosinnano mitteenni adhineemmo yiinohu gashshaanchu; mittimma sufisiisateno qaale e’ino.
Gedeote zoone qaru gashshaanchi kalaa Abiyooti Demisse isi widoonni; Gedeotenna Sidaamu daga mundeete xaadooshshi noonsa daga ikkansa qummi asse; daganna dagoomu mitteenni uurrinummoro mitteenni lanteemmo; diinnankeno qeelleemmo yiino.
Ayyaanu mundee aatenna wolootta qixxaawonni dukkisame iibbadu garinni ayirrisaminoha ikkanna ayyaana ayirrisatenni woyyaabbino gumulo borreessiissino woraddatenna wolootta tantanora afanshanna baraarsha uynoonni.
Gaazeexu Odeessaanchinni
Bakkalcho Bocaasa 22, 2015 M.D
