Qiddist Gezaheny
Addis Ababa:- Bakkalcho Gaazeexi Sidaamu dagara uminsa Afiinni attamama dagoomaho mashalaqqe garunni iillitanno gedenna mashalaqqetenni baqqi yitinore assannoha jawa qeecha afi’rinota xawinsi.
Bakkalcho Gaazeexi Itophiyu Pireesete Uurrinshara attamama hanafinkunni Sayikki diro kiirsiisasi ledo amadisiisaminohunni Uurrinsha hasaawissinohu Faana Biroodikaaste Korporee Shaashamanne Faana FM 103.4 qixxaawote goli sooreessi odeessaanchu Geetaachew Mu’latihu coyi’ranni; Gaazeexu Sidaamu afiinni attamamasi qarunni dagoomu giddo dadhinoonni afiinni mashalaqqete iillo heedhanno gede assitanno yiino.
Hakkiinnino sae mashalaqqete du’nama kayinni baqqi yiino dagoomi kalaqamanno gede kaa’litannota xawisino. Ledoteno, Bakkalcho Gaazeexi Sidaamu Afiinni Gaazeexunni attamamatenni umiha ikkasi kayse; dhagge, bude, balchooma, heeshshote hornyanna addi addi hajubba borrotenni amadate aana konni aleenni loosa hasiissannota huwachishino.
Odeessaanchu Geetaachew xawisanni; Gaazeexu woloottu miidiyubba ledo mittimma kalanqe loosatenni dagoomahonna woloottu miidiyubbara mashalaqqete bue ikkine haaronna rakkino mashalaqqe iillishate konni aleenni jawaante loosa hasiissannota qummeesse Shaashamannete FANA FM 103.4 Sidaamu afiinni odeessa hanaffunkunni 9ki diro amaddinota xawise Bakkalcho gaazeexi sa’u lame dirra giddo halaalaancho buenna qansaanchonkeeti yiino.
Bakkalcho Bocaasa 15/ 2015
