Amsaalu Felleqe
Addis Ababa:- Tigirayete qodhaano wolqa harancho yanna giddo qodhonsa tirte qixxeessinoonnisa base e’annota qodhaanota hajajaanchi Leetenaal Jeneraal Taaddese Worrede egensiisi.
Gaamote hajajaanchi Tigirayete Televizhiine xaawira uyno xawishshinni;olu Tigirayete daga calla ikkikkinni gobbate gede hembeelamme kalaqinoha ikkasinni; ‘’xaphooma Itophiyu daga baxxinohunni Tigirayete daga olunni keeru widira assitanno reekkora agarranninke qeecha fulleemmo’’ yiino.
Nayiroobi harinsoonniti keeru sumiimme gumulantanno gede illachinshe loonsanni hee’noonnitano xawisino.
Hiikkuno Tigirayete qodhaano wolqa mitte hajajo hundaanni galtannotanna konni gobbaanni ikkinohu Tigirayete wolqa nookkita xawisinohu hajajaanchu; konni garinni sumiimme mitte mittenti miilla affanno gede assinanni hee’noonni yiino.
Tigirayete wolqa aliidi hajajaanonni eeliidi deerrira noori gaamote miilla geeshsha keeru daafira iillinoonni sumiimme lainohunni huwanyoote kalanqoonnitanna gutunni sumuu yinoonnita kayse; aantanno lame barrubba giddono gumullannita kulino.
Gaamo qodho tirtannota Piritooriyaho faajjetenni worroonnita qummeessatenni qodho tira Tigirayete daga ga’labbote bidhatto hedote giddo worino garinni gumullanni yiino.
Gumullanniti qodho tirsiisate harinsho qorichu gede ikkikkinni keeru harinsho gede la’nannitano hattonni.
Keeru sumiimmera Federaalete mootimmanna HWHT mereero iillinoonni danchu garinninna macciishshamatenni ikkinota kule; qodho tirate harinsho gufissanno ikkitubba kalaqantannoki gede qorophatenninna gargaratenni halamme gumullannitano coyi’rino.
Bakkalcho Bocaasa 15/ 2015
