Amsaalu Felleqe
Addis Ababa:- Bakkalcho Gaazeexi Itophiyu pireesete uurrinsha duucha Afuubbanni mashalaqqe dagoomaho iillishate ajuuja gumulatenna Itophiyu daganna dagoomi Afuubbanni iillate hendeenna adda ikkino Gaazeexa ikkasi Uuurrinshannihu Amadote handaari miseessu loosu gumulsiisaanchi Kalaa Fiqaadu Ketema coyi’rino.
Kalaa Fiqaadu Bakkalcho Gaazeexi attamo hananfoonniha layinke diri barranna sayikki diri kiiro mitte attamo lainohunni Gaazeexu qixxaawote kifilera xawisino garinni; ‘’Sidaamu daga ayimmansa ayirrisse taalleenyunni uminsa umonsa gashshate seeda dirra sharrantanninna waaga baattanni keeshshite soorrotenni dawaro afidhe qoqqowunni tantanama dandiitinoha ikkasenni Bakkalcho Gaazeexi gobbankera daggino soorro gumaati’’ yiino.
Sidaamu qoqqowo ikka Bakkalcho Gaazeexi ilamanno gede jawa kaayyo kalaqqino yiinohu kalaa Fiqaadu; tayxe lamu diri albaanni Itophiyu pireesete uurrinshara Federaalete deerrinni Sidaamu Afiinni attamama hanafamino Gaazeexinni Federaaletenna Sidaamu qoqqowi gobbaanni latishshunna danchu gashshooti ikkitubba Sidaamu dagara Afiinsanni nabbawaanote iillishate hende hanafoonniha ikkasi xawisino.
Gaazeexu dhaggenniha hattono Sidaamu daga dhagge calla ikkikkinni gobboomitte dhaggeno Sidaamu Afiinni maareekkinanniha ikke sufanno yaanniiti coyi’rinohu.
Wolu garinnino, Bakkalcho Gaazeexi Sidaamu Afii borronniha ikke lophanno gede jawa kaayyo kalaqanno; konni garinni Gaazeexu attamama hanafinkunni kayse techo geeshsha attamote amadono yanna yannantenni woyyeessinanna kaajje sufinoha ikkasi kulino.
Qoqqowu mootimmano Itophiyu pireesete uurrinshara qoteho ikkite halamatenni Gaazeexu sufino garinni attamamanno gede bejetetenna hedotennino jawaata irko assitanni afantannota kayise qoqqowu gashshootira galata shiqishino.
Gaazeexu Itophiyu giddo harinsannita jajjabba hajubbanna ikkitubba hattono Sidaamu qoqqowira addi illacha tugatenni latishshu, turizimete, miinju, poletikunna budu hajubba maareekkinanni mashalaqqubbano tuqinsanniha ikkanna hattono daga kayissanno xa’mubba haruunsatenni haja la’annonsa bissa dawaro qoltanno gede assinanni hee’noonniha ikkasi huwachishino.
Gaazeexu qoqqowu giddo lowonta hasamanni daynoha ikkasinni xaa yannara attamote fulo assinanni waagi erotenni lexxinoha ikkinoro, albillicho kayinni dandaami garinni batinyunni attammanni tuqisate hendoonnita coyi’rino.
Bakkalcho Bocaasa 15/ 2015
