Amsaalu Felleqe
Addis Ababa:- Itophiyu Pireesete Uurrinshara Federaalete deerrinni Sidaamu Afiinni gaazeexu attamo hanafama babbaxxitino gobboomitte loossa harunsatenni Afuu horonsi’raanora mashalaqqe iillishatennino aleenni gobboomitte dhagge maareekkate dandiisiisannota Uurrinshannihu qaru loosu gumulsiisaanchi kalaa Geetinnet Taaddese egensiisi.
Kalaa Geetinnet Bakkalcho Gaazeexi kifilera uyno gaazeexu sayikki diro amadasi harunse uyino xawishshinni; Itophiyu duucha bude, ayimma, balchomma Afoonna amma’no mittimmatenni amaddino gobbaati yee; gobbankera loonseemmohu duuchu handaari loossara qeechansa fultanno garinni babbaxxitino Afuubbanni mashalaqqe dagoominkera iillisha noonke yaanni coyi’rino.
Konni albaanni mashalaqquwa attamate horonsi’neemmori woloottu gobbate giddo Afuubbara ledotenni Sidaamu Afoo horonsidhannorira gobboomu deerrinni harinsannita babbaxxitino loossanna ikkitubba lainohunni Sidaamu Afiinni mashalaqqe iillishatenni uminsa qeecha fultanno gede dandiisiisatenna xaphooma gobboomitte latishshinna Jireenyu harinshonni horaameeyye assate miidiyu noosi qeechi jawa ikkinota xawisino.
Konni kaiminnino, dimokiraasete amanyooti gatamarshi harinshora jawa irkonna kaima ikkinota huwatatenni Sidaamu Afiinni Bakkalcho Gaazeexa attama hanafankenni baxxinohunni Federaalete deerrinni loosantannota babbaxxitino latishshunna danchu gashshooti loossa Sidaamu Afii horonsi’raanora borrotenni iillishate dandiisiisinonke yaannino guwursino.
Sidaamu qoqqowu giddo harinsannita dagoomitte, miinjunna poletiku hajubba yanna yannantenni harunsinanni mashalaqqe Federaalete deerrinni afantannori Afuu horonsi’raanoranna woloottu Afuubbannino wolootu dagoomira iillishanni mootimmanna daga xaadisate buusa ikkanno gede assinanni hee’noommo yiino; kalaa Geetinneti.
Hakkiinnino sae, qoqqowuno haaro ikkasinni yanna yannantenni dagganno soorronna lophote harinsho harunsatenni mashalaqqe borrotenni dhaggete ikkanno garinni
maareekkinanni Gaazeexa ikkasino kulino.
Sa’u xibbeenna hakkonni ale ikkitino dirrara gobbankera babbaxxitino handaarranni kalaqantino ikkitubbanna gumulantino loossa maareekkine amandoonnihu borrotenni ikkasinni dhaggeteno ikko babbaxxitino xiinxallora hasi’nanni yannara borrotenni maareekkine amandoonnire horonsi’nanniha ikkasinni Bakkalcho Gaazeexino attamo hanafaminkunni sayiki diro amadasinni albillichono jawa sanadenna dhagge amade keeshshiishannoha ikkanno yiino.
Wolu garinni Sidaamu Afii baca bude, balchooma, hornyubba, dhaggenna ikkitubba kullanniha ikkasinni Afuu borronniha ikke roorenkanni bowiranno gede Gaazeexu attamo hanafa qeechisi luphiimaho yiino.
Afoo ronsannihu maxaaffatenni calla ikkikkinni Gaazeexubbatennino ikkasinni qarunni mashalaqqe yannatenni dagoomaho iillishatenni gobboomitte lophora assinanni hee’noonni sharrora Sidaamu Afoo horonsidhanno dagoomi beeqqaano ikkitanno gede assate amaalete mininni lallawunni adhinoommo biilloonye loosu aana hosiisatenna istiraateeje mixonkenni gumulate uurrinshanke gede Bakkalcho Gaazeexi attamo hanafisiinsoommo yiino.
Sidaamu daga seeda dirrara umise umose gashshate xa’mo kayissanni keeshshite gobbankera daggino soorronni xa’mo bayi’riidi seerinna dimokiraasete harinsho garinni dawaro afidhu gedensaanni qoqqowunni tantanama babbaxxitino kaayyono haadhe daggino.
Kuri mereerinni Federaalete deerrinni Sidaamu Afiinni Attamo hanafanke Sidaamu dagara calla ikkikkinni qoqqowunni afi’nannita babbaxxitino handaarra mashalaqquwa woloottu Afuubbannino tirotenni woloottu dagoomira iillishate kaayyono hattonni kalaqinoha ikkasi coyi’rino.
Wolu garinnino addi illacha tugatenni Uurrinshate fannoonnihu attamote gumi rahotenni dagoomaho iilla dandaanno gede qoqqowoho sina fannoonnitano qummeesse; albillichono qoqqowu mootimma dagate hasatto kaima assatenni leellishshino fajjonna irkonni hattono Uurrinshanke halammenni Gaazeexunni calla ikkikkinni woloottu Afuubbanninna Sidaamu Afiinni tuqu xaadooshshuwa hanafate mixo amandoonnitano egensiisino.
Bakkalcho Bocaasa 15/ 2015
