Qiddist Gezaheny
Addis Ababa:- Bakkalcho Gaazeexi Itophiyu Pireesete Uuurrinshara attamama hanafa qoqqowu giddo noota Turizimete jironna Investimentete injoo woloottu qooxeessubbara egensiisate widoonni lowo kaayyo kalaqqinota Sidaamu qoqqowi pirees Sekretariyaatete sooreessi kalaa Filiphoos Naahomihu xawisino.
Kalaa Filiphoosi Bakkalcho Gaazeexi Attamama hanafinkunni sayikki diro amadasi ledo amadisiise uurrinshate ledo assino hasaawinni; Gaazeexu attamama harunsite Itophiyu Pireesete uurrinshanna Sidaamu qoqqowi e’ino sheemaati garinni, Qoqqowu giddo nooti addi addi jironna kalaqantanno ikkitubba uurrinshate giddo loosu aana afantanno gobba giddonna gobbaydi
Afuubbanni borreessamasenni qoqqowoho noo jiro egensiisate hale ikkitinota kaysino. Hattono Afuu lophora noosi kaa’lo luphiimate yiino. Ledoteno, ikke saire yanna yannatenni borreesse amadatenna mashalaqqete bue ikke owaatate Gaazeexu jawa qeecha fulanni afamannota coyi’rino.
Ikkollana, xaa geeshsha noo harinshonni Gaazeexu qoqqowu giddo baalante qooxeessubbara hala’le iillate widoonni foonqe hee’rase kayisinohu kalaa Filiphoosi; baxxinohunni rosu minna Gaazeexa garunni horonsira noonsa; korkaatuno, albillitte rosoho kaa’lara dandaannohura yaatenni hedosi worino.
Tenne widoonni rosu minnara Gaazeexu hasiishshi daafira huwanyo kalaqate widoonni gatto noota kule; Gaazeexa lainohunni handaaru bissara hasaawu bare qixxeessine huwanyo kalaqa hasiissannota duu’re huwachishino.
Hattono lamala lamalantenni attamame fulino Gaazeexi yannatenni sheemaate e’ino woraddaranna loosu minnara yannatenni iilla hooganna kuusame keeshsha koffeenya kayissanni keeshshitino hajo ikkase qummi asse; tini hajo konni gedensaanni heedhanno yannanni taala hasiissannota ikkase xawisino.
Aanteteno sheemaate e’inokki qooxeessubba ledo hasaawa assine Gaazeexu iillinokki qooxeessa baalankawa tuqisate aana kaajjinshe loosa hasiissannota qaagiissino.
Bakkalcho Bocaasa 15/ 2015
