Amsaalu Felleqe
Addis Ababa:- Itophiyaho Aliyye qooxeessira olu korkaatinni gawajjantino qooxeessuwara assinanniti mannihimmate irko kaajjinshe sufisiinsannita Itophiyu danote bidhatto massago komishiine egensiissu.
Shoole doyichonni 263 mannihimmate irko hogobbino kaameellano qooxeessuwa iillitino. Itophiyu Danote Bidhatto Gashshooti Komishiine Dagate Xaadooshshi Dayrekiterichi kalaa Debbebe Zewude Itophiyu pireesete uurrinshara xawisino garinni; Itophiyu mootimmanna HWHT mereero iillinoonniti keeru hasaawi sumiimme harunse baxxinohunni Aliyye Itophiyu qooxeessira gaancete korkaatinni gawajjantinori Amaaru, Affaaretenna Tigirayete qooxeessuwara mannihimmate irko garunni iillitanno gede assinanni hee’noonni. Mootimmatenninna mannihimmate irko shiqishshanno uurrinshuwanni gawajjantino dagoomira irko assinanni hee’noonni yiino.
Kalaa Debbebe xawishshi garinni; Itophiyu mootimmanna Danote bidhatto gashshooti komishiine qinaabbe loossanno garinni hasaambe sumiimmete iillinoonniha ikkanna xaa yannarano mannihimmate irko garunni iillitanno gede assinanni hee’noonni.
Bero barrinni 67 gongo’mishamaano Shire, Shiraaronna Akisumi qooxeessuwara sagalenna sagalimmate gobbaanni ikkino garinni horonsi’nanni irko iillishate hodhitinota qummeessino. Beroha lede 263 mannihimmate irko hogobbino kaameella bobbakkinotanna kuri mereerinni xagganna xaginaateho horoonsi’nanni uduunne hogobbino kaameella afantannotano xawisino.
Iillinshoonniha mannihimmate irkono gawajjantino qooxeessuwara tuqinsanni hee’noonni yiinohu kalaa Debbebe; gawajjo olu korkaatinni iillitinota ikkasenni; baxxinohunni sagalete gide wiinamunni iillisha hasiissannohura albillichono kaajjinshe sunfannita qummeessino.
Fayyimmate hajo, rosu, wayinna woloottu hajubba lainohunnino hasiissanno irko kaajjinshe sufuisiinsanni yiinohu Kalaa Debbebe; olu korkaatinni dagoomu aana iillitinota tiiu gawajjo hursate hajo lainohunni illacha tunge loonsannitanna tenne hajono buuxxannonna massagganno gaamo basete geeshsha sonkoonnita lede coyi’rino.
Bakkalcho Bocaasa 8 / 2015
