Yaareed geetaachew
Addis Ababa:-Itiyo-Telekoome qeecha boode hallanyu handaarira sayisate hattono Telekoomete handaarinni Itophiyu dikko soyikkiha ikkatenni karsamate Telekoomete fajjo afi’ranno kubbaaniya filate kalqoomu garafo fushshitu.
Itiyo Telekoome boodunni hallanyaho reekkatenna Itiyo- telekoomenna Safaari-koom Itophiya lainohunni ledonniha Tele-koomete fajjo uyinanni ikkito aan woxu ministirichi kalaa Ahimed shidenna Minister De’etu Dr Iyyoob tekkaallinyi hattono Kominikeeshiinete biilloonyi qaru dayirikiterichi Injiner Baalcha Reebo bero xawishsha uyitino.
Xawishshinsa aana Kalaa Ahimed shide xawisino garinni;Kalqoomu garafo Itiyo-telekoome 40 anga qeecha hirate taxi yee keeshshinoha sufisate wirro haaru garinni hanafisiisa dandiinoonnita coyi’rino. Kalqoomu deerrinni miinja qiidanna Aliyye ola harunse gobboomu deerrinnino injoo nookki daafira taxi yee keeshshinotano ledatenni.
Xa kalaqantino sumiimme garinni sufanno gede muro sayinsoonnitano xawishshisinni buuxisino, gumulsinanni gari Telekoomete handaara heewisamaanchonna lopho hattono Dijitale miinji mixo gumulsate kaa’lannotano kalaa Ahimed shide huwachishino.
Roorimankanni Telekoomete handaarinni Itophiyu dikko karsamate hasatto noonsa bissa fulino websayite garinni heewisantara dandiitannota coyi’rino. Garafo beronni hanaffe aantino sase lamalara awurroppu kiiro garinni sadaasa 19/2022/2015 M.d geeshsha eo gamba assate fano ikkanno yiino.
Itiyo-Telekoome qeecha hidhate hasatto noonsa bissa beronni hanaffe haaru garinni hasattonsa xawissanno gede fano bassinoonnita xawisinohu Ahimed Shide; kaajjadonna dhuku noonsa kalqoomu kubbaaniyooti heewisantara dandiitanno yiino.
Bakkalcho Bocaasa 8 / 2015
