Abrahaam Saamueel
Yirgaalame:-Sidaamu Qoqqowira Yirgaalamete Qinaabbinoti Giwirinnu Industirete Paarke lattinota 97 hekitaare baatto dureeyyete lizetenni saaysate qixxaabbinota Qoqqowaho Industirete Paarke Laayinki Loosu Qineessaanchi Kalaa Hayilu Yetterihu xawisino.
Paarkete loossara e`ino laashshaano mereero, giwirinnu laalcho baatto loosidhe galtino dagawiinni haadhe loosse gobbate giddoranna widi dikkora shiqisha hanaffino dureeyye noota xawisino. Avokaadote laalcho baara widi dikkora shiqisha hanaffino dureeyye mereero Itophiyunna Neezerlaandete kubbaaniy saiha shoole diro 5.8 miliyoone doolaare eo afi`noonnita qummi assino.
Layinki Sooreessi xawishsi gara ikkiro, 11 sheede ijaareenna karaayya`noonni. Paarkete giddo latisatenna laalcho laashshate wowe e`inori gobbarinna giddo dureeyye 20 mereero shoolu laashsha hanaffino. 1 wo`naalshu aana no. 6 kayinni baankete ledo sheemaate e`e harinshote aana no. Lattinota 97 hekitaare baatto dureeyyete liizetenni saaysate qixxaanbe hee`noonnita kulino.
294.5 hekitaare hala`linyu nooti paarke, dikko, loosu, gallanni baycho, gangalantannihanna ishine xalashshinanniha baycho amadinoho. Fayyimmate, poolisete mereershinna rosu mini hee`rannosi yiino.
Paarke Addis Ababunni 318 km xeertinyira, Hawaasi Quchuminni qole 43 km xeertinyi aananna Yirgaalamete Quchuminni Itophiyu Keeniyu doogo aana afantannota ikkasenni dikkote injiitinota ikkitinota qummeessino.
Nezerlaandete Kubbaaniyi Avokaadote zayte woyyaawino waaginni Aropu dikkora shiqishanni afamanno. Kubbaaniyu, 88 kume ikkitanno daga ledo xaadooshshe kalaqinota xawisino. Paarkete giddora e`e looso hanaffinori mereero Neezerilaande, Xaaliyaanu, Chaanunna Itophiyu dureeyyeno afantanno.
Joojo (daily) adote laalchonna malawu laalcho, Itophiyu dikkora shiqishate hanaffinotanna Joojo ado laashshaanchi lamu diri gedensaanni, gobbara soyaanno yine agarrannita hattono, bunu laalchi wo`naalshu loosi aana nootanna malawo fushshinanni faafirikino noota coy`rino. Wo`munni wo`ma looso hanafiro, 57 faafirikka amadannota, 152 sheede heedhannotanna 4 xibbi kumi mannira loosu kaayyo kalaqanno yine agarrnnita huwachishino.
Giwirinnu uduunne adhe loosatenninna giwirinna yanneesatenni Industirete widira laalcho soorrate qara illacha assine uurrinsoonniti paarke, 131 kumi baatto loosidhe galtino dagara dikkote xaadooshshenna 1500 qooxeessu wedellira xaaddotenni loosu kaayyo kalaqinota egensiisino.
Giwirinnu uduunne loonse Industirete widira soorra, handaarra yannich assa, gobbata woxu soorro abba, tekinooloojete egenno woleho saayisa, miinja lossanna loosu kaayyo kalaqa qara illacha asse loosanni noota Kalaa Hayilu Yetterihu xawisno.
Bakkalcho Bocaasa 8 / 2015
