Abbebech Maatewoos
Addis Ababa:- Wodiidi Afrikira assinoonniha keeru sumuumme gumulate harinsoonnihu Nayroobi hasaawi, malaatinsoonni keeru sumuumme gumullanni gara lainohunni gutunni sumuu yaate widira iillanno gede dandiisinoha ikkinota Itophiyu gargarooshshu olanto Itaamazhoor shuum fild marshaal Birhaanu Juulihu egensiisi.
Federaalete mootimmanna HWHT mereero wodiidi Afrikira iillinoonniha keeru sumuumme gumulate dandiisanno gede Itophiyu gargarooshshu olantonna HWHT qodhaano mereero Nayroobi harinsanni keeshshinoonni hasaawi sa`i sambatu barra jeefinoha ikkanna hasaawu aana beeqqitanni keeshshitinoti Itophiyu riqiwamaano gaamono tenne lamala giddo Addis Ababa Boole kalqoomu horophilu fooliishshora iibbadu garinni wosinsi`noonninsa.
IFDR gargarooshshu olanto itaamaazhoor shuum fild marshaal Birhaanu Juulihu; Keeniyaho Nayroobi assinoonni hasaawa lainohunni Addis Ababaho Boole kalqoomu horophilu fooliishshora uyno xawishshinnino wodiidi Afrikira hananfoonniha keeru hasaawa jeefisate ikkitanno loosu mixo aana linxo hasaawa assitino gede coyi`re; assinoonni hasaawinni sumuu yinoonnitanna konnirano malaatinsoonnita xawisino.
Itaamaazhoor shuum coyi`rino garinni; Piriitooriyu sumuumme danchanna seerunna bayiriidi seeri amanyooti widira abbate hasatto leeltinoha ikkanna lawino garinni Nayroobi hasaawi noo foonqubba taaltanno gedenna gumulshu aana gutunni sumuu yaate dandiisinoha ikkasi huwachishino.
Sa`u shoole dirra Itophiyaho ayirritanno yannaatinkanni yinohu Itaamaazhoori; Itophiyu gobbate gede sufatenna sufa hoogate shetto giddo keeshshitinota kayse; soorro daggu woyte hanqitino wolquwa heeransa korkaatinni darga baalaho ga`labbote qarrinna wole mitiimmubba kalaqantanni keeshshitinota xawisino.
Ikkollana gobbate gargarooshshi olanto gobbansa mereersha assite kalaqantino diigaancho millimillubba qorqorate heeshshi gotti yitanni keeshshitinota qaagiisse; olanto konni garinni noo yannara iillitinonsa gawajjonni gobba gadachante olu giddora e“ase korkaatinni gobbate aliyye kifilera keeru xeerti`re keeshshinota coyi`rino.
Olu harinsi gedensaannino keere abba dandiinanninkanni yinohu fild marshaal Birhaanu; ikkollana keeru mitte daga hasattonni daara dandaannokkiha ikkasinni Itophiyu wirro higge keeru kaayyo injeessiturono gumulamikkinni keeshshinota coyi`rino.
Olu ayirrannonna gobba baca waaga baatisiisinoho yinohu fild marshaal Birhaanu; xa mudeetewinninna gawajjotewinni rosicho adhine qarrubba tirate harinsoonnihu keeru hasaawi dancha tunceessa ikkinota coyi`rino. Keeru sumuumme barrisse dagginoha ikkirono danchate yino.
Fild marshaalichu xawishshinni; konni gedensaanni gobba ola duqqitanno qoti dinose. Xa Tigrayete noo massago tenne huwattinoha lawanno. Ikkinohurano Piriitooriyaho assinoonni sumuumme danchu garinni harinsoonni yaa dandiinanni.
Baalunku ge`ino doogonni seerunna bayiriidi seeri amanyooti widiranna qarra hasaawunni tiratenna ba`ino coyebba biddi assate lamunku widoonni sumuu yinoonnitano fild marshaal Birhaanu coyi`rino.
Bakkalcho Bocaasa 8 / 2015
