Godowu canca, game, qasi’ranna godowa fuugisa, injoo ho’litanno macciishshamme, looqqi assatenna tushshiishate hattono gobbara qolate qarra abbitannoti godowu xisso saga’latenna baakteeriyu widoonni kalaqantanno xissooti.
Konni garinni kalaqantanno godowu xisso aleenni xawinsirinni ledote luphi yino iibbillenna umu damuume hattono bisu iibbabbanna hunkuu hee’ranno. Godowu xisso abbitanno ciyubba mereerinni qorowamanna kalaqanturono garunni harunso assi’ra hasiissanno. Baaluri aleenni kayinni aantete worroonni doogo horonsiratenni godowu xissonni co’onna hagiirraamma ikka dandiinanni.
Batinse Waa (Du’namaanchoricho) Aga:- du’namaanchore batinse adha godowu xisso yannara hunkuunna gobbara qolatenni mannimmatenni fultanno shiilo wirro riqiwatenna taalino mannimmate amanyootira qolate kaa’litanno. Konnirano waa batinse aga qara doogooti.
Konni gobbaanni waco labbinore shota sagalla adha xaginaateho
Muuze, Ruuze, Appile woy Poome, Paappaayu, Jaanjiweelu. Dinnichu, Tumu, loomete shae godowu giddo kalaqamanno qarriranna qelpheepho ajishi’rate hattono mannimma kalaqantino xissonni hooggino shiilo, wolqa, jawaantenna baqqeenya ikkadu garinni riqiwate dhuki noonsareeti.
Coyinke aana saltono noo maciishshamme hoolte taalino garinni Asiide fincitanno gede tenne sagalla qeechi luphiimaho.
Godowu xisso macciishshamme kalaqantanno woyte sagalete ledo barrunni lame hinge Lame woyi Sase guma tuma adhanna loomete huuncamme horonsira hasiissanno. Xissanno bayicho shiimunni xiimbe xissote macciishshamme noo qooxeessubba sasu qubbichinni xiimbanni cuukka gurdaminore lawannoricho diigate kaa’litanno.
Batinsikkinni shiimunni xiimbe darga anfihu gedensaanni shiima geeshsha cuukkano kalaqantino xissote macciishshammenni woyyimma afi’rate kaa’litanno. Godowu game macciishshamme heedhanno woytenna hanaffanno woyte batidhinokki fooliishsho assi’ra mannimma xaaddinose xissonni rahotenni woyyaabbanno gede assitanno.
Xisso batidhanni hadhuronna iibbabba, umu damuume, mikitate daaqa, bati’rino hunkii hattono godowu mikita qooxeessira luphiima game heedhuro godowu game gobbaanni wole giddoyidi xisso heedhara dandiitannohura fayyimmate uurrinsha hara hasiissannota hawa dihasiissanno.
Xisso hanaffu yannara ra’ino sagalla ledo karsiinse qixxeessinannita wiinamu sagalla horontanni saga’la dihasiissanno.
Adote sagallano horonsira xissote bati’rara wole korkaata ikkitannohura togoo rosicho agura hasiissanno. Horonsi’nirono mini giddo garunni qixxeessinoonni geinto calla adha amaallanni.
Maxine batidhino sagalla hattono shotanna coommado sagalla tenne yannara adha horontanni dihasiissanno. Xagisaano ogeeyye buna, coommado Chokkoleettanna Ispiriise tini macciishshamme heedhanno yannara co’ontanni horonsi’nannikki gede amaaltanno.
Konni gobbaanni goxanote yannara agatto aga,hashsha wo’ma godowu giddo luphiima xiiwonna looso batissanno daafira togo assa hoongiro doorranni.
Bakkalcho Bocaasa 1, 2015 M.D
