Addis Ababa:– Federaalete Mootimmanna HWHT mereero assinoonniti keeru sumiimme Afiriku daga qarransa uminsanni tira dandiitannota jawa sokka sayssinotanna dhaggete sumiimme ikkitinota Tigirayete Dimokiraasete Paarte (TDP) murrichi Dr Aregaawi Berihe egensiisino. Keeru sumimme halaalancho ikkitanno gede baalunku umisi qeecha fula noosi yiino.
Paartete murrichi Dr Aregaawi Berihe Itophiyu Pireesete Uurrinshara xawisino garinni; Federaalete Mootimmanna HWHT mereero assinoonni sumiimme baalanka foolishshiishshinotenna Afiriku gobba gede jawa sokka sayissinot hattono dhaggete sumiimmeeti. Sumimmeno rahotenni loosu aana hosiisa hasiissanno yiino.
T.D.P konni albaanni; “Keeru doogo woyyitanno; olu diwoyyanno” yite hedo uyitinota qaagiisse, xaano hananfoonniti keeru sumiimme doogo qarru aana noo dagara jawa fooliishsho ikkitinota danchu garinni adhinota xawisino.
Dr Aregaawi xawishshi garinni, baalunku qoqqowira olunni qarrantino dagara keeru sumiimme jawa tiro afidhinota kulino. Heeshshonsa, jajjansanna miinjansa gooffe qoleno dagoomunna polotikunni jawa gede gawajjantino Tigirayete dagara roorenkanni kasseenya aannoho yiino.
Tigirayete daga keeru sumiimmenni calla hexxotenni gala hanaffinota qummeesse, sumiimmetenni hegersino keeri daannota xawisino.
Mite mite gobbaydi wolquwa Afiriku Mittimma keeru sumiimme massaggannokki gede babbaxxino korkaatinni gufissanni keeshshitinota qaagiisse; Afiriku massagaano hixamanyite hajonsa uminsata assidhe keeru sumiimme danchu garinni gumula dandiitinota paartete murrichi galatino.
Afiriku daga gobbaydi xiiwo dandiite yekkeersiissara baattino daafuri, Afiriku daga ayiino mereeroho eikkinni qarransa uminsanni tira dandiitannotanna Afiriku wolambinatesi kaajjishe sufa dandaannota tini sumiimme jawa sokka sayissinota coyi`rino.
Itophiyu daga qarrase ayno anga worikkinni umisenni tira hanaffinohu techo ikkikkinni Abbay Kofatto ijaari hanafami barrinni ikkinota xawisnohu Dr Aregaawi; xaano ayno mereeroho xolli yiikkinni keeru sumiimme jeefisama jawa tiro noose yiino.
Daga polotiku ayyaaninni wo`mite uminsa horora dagate mereero gibbo wixxanno gaamonna hedo reqecci assitanni, sumimme uulla dirrite loosu aana hossanno gede baalunku umisi qooda fula noosita xawisino.
Polotikunna miidiyu tenne sumiimme qinaabbinota ikkitano gede jawa qeecha fula hasiissannonsahura, insano qoodansa godo`la noonsa yee woshshatto assino. Horonsa mereersite qarra halashshitannonna leddino qara abbitannore polotiku hettisamaanonna miidiya reqqecci assatenni daga tantanante sharrama hasiissannonsa yee sokkasi saysino.
Abrahaam Saamueel
Bocaasa 1, 2015 M.D Hamuse
