Addis Ababa:– Muuziiqu loosinni 60 diro farcotenna wolambinateho sharraminohu sharransiisinohu Ayirrinyu Dr Artsit Ali Birra madaarshu amuraate eembarra Dirre Daawaho gumulloonni.
Artist Ali Birra madaarshu amuraatenna geegiisso lainohunni, Federaalete Mootimmanni, Oromiyu Qoqqowinni, Addis Ababu Gashshootinna Dirre Daawu Gashshootinni filantinori qara komite uurrinsoonniti qaangannite.
Artist Ali Birra madaarshu amuraati aana hasaawa assinohu Mootimmate Kominikeeshine Owaante Ministeere Deetichinna Komitete miili Kalaa Kabbadi Deesiisihu, Ayirrinyu Dr Artist Alii Birra lubbo ba”a Itophiyu baalaho lowo daddileeti.
Kalaa Kabbadi xawisanni, Artist Ali Birra boco sane ale maalallanni ikkadimmasi, ogimmasinna dandoosi sirbu industirera jawa lopho uytinote. Baxillunninna roduuwimmatenni loosinohu loosisi bareeda ikkinota buuxisannoha ikkinohura, madaarshu amuraatisi bareedda geegiissinanni garinni ikkinota kulino.
Ministerete Deetichi xawishshi garinni, sirbunni baxille, roduuwiimma, mittimma, farcotenna wolambinateho jawa qoodasi fulino. Farcotenna wolambinateho sharramino; sharransiisino.
Artisitichu lubbo ba”atenni federaalete Mootimma lowo gede daddillitino. Maatete, fiixaho, firahonna baxillaanosira Kaaliiqi shesho aannonsa gede huuccineemmo. Artsitichu gobbankera 60 diro muuziiqu industirera jawa qeecha fulino. Roorenkanni, Afaani Oromote sirbinni afamokkinninna, haammatu afiinni sirbino. Lawishshaho, Affaarete, Aderete, Amaaru, Sumaaletenna Suudaanete afiinni sirbanni muziiqu industire lophitanno gede qoodasi fulino yiino.
Oromote Qoqqowi Pirezidaantichi Borro Mini Sooreessinna Oromote Qoqqowi cinaancho komite gambisaanchi Kalaa Mogesi Idee”e isi widoonni, Artistichu lubbote noo yannara mootimma jawa irko assitanni keeshshitino yiino.
oyimbarra soodihunni 2:00 saatenni hanafe Biishooftu noo minisinni Addis Ababa geegiissini gedensaanni Addis Ababaho Jaaloommu Xawira aliidi loosu massagaano, loosu jaallasinna dhaggeeffattannosiri noowa Artist Ali Birra geegote pirogiraame pirogiraame harinsoonni.
Sufeno, ilamino bayicho Dirre Daawa bareedaho assinanni geegiissonnni geegiissini gedensaanni Dirre Daawahono Musiliimete ama`no garinni solaatu amuraate harinseenna barrihunni 9:00 saatenni madaarshu amuraate gumulloonni.
Qara Komite Gambisaanchinna Itophiyu sirbu maamari Pirezidaantichi Artist Daawit Yifiru, Itophiyu ile maseenino gobba dikkino; haammata bareedda noose; tenne bareedda giddo mittu Artist Ali Birraati yiino.
Konni gedensaanni, Ali Birra looso egensiisatenni ilama rossanno gede assinanni yee; saiha 60 diro Ali Birra sirbaho jawa illacha uynanni gede assino. Sirbu giddora ea saala ikkitino yannara sirbu daafira rosiise daga so`rotenni qolino yiino.
Abrahaam Saamueel
Bocaasa 1, 2015 M.D Hamuse
