Addis Ababa:– Deerrase agartino Qamade gobbaydi dikkora shiqishate balaxote qixxaawo assinanni hee`noonnita Qooxeessu Xaadooshshi Ministere xawissu.
Daddalunna qooxeessu xaadooshshi ministirchi kalaa Gebiremesqel Caala soyaanote ledo assino hasaawinni xawisino garinni; Itophiyu kaa`lote Qamade eessatenni sa`e isilanchonna deerrase agartino Qamade gobbaydi dikkora shiqishate balaxote qixxaawo assitanni no.
Gobbaydira sonkanni Qamade gobbate giddo horonsi`nannitenni gattinota ikkase coyi`rinohu Ministirchu; tennera kaa`lanno gede mootimmate widoonni luphiima illacha uyne loonsanni hee`noonni yiino.
Daddalu Amanyootinna Laysensiing Handaari Ministir Dieeti kalaa Teshaale Bellihu isi widoonni; kalqete deerri dikkora heewisamaancho ikke shiqate isilanchimmate hajo yekkeerote shiqa noosekkitanna soyaanono tenne hedote giddora eessa hasiisannonsata huwachishino.
Soyaanono alba Itophiyu noose su`mi soorrameenna Qamade eessatewiinni soyaate widira iillase gobbanniha dancha su`ma gatamarate dancha tunceessa ikkasi xawisino. Tungoonninsata gobbate yawo fulate qixxaabbinore ikkansano buuxisino.
Sai dirirano arri gorsi Qamade latishshinni 24.5 miliyoone kuntaala Qamade afi`noonnita xawisinohu Giwirinnu ministirchi kalaa Umer Huseen; sa`u shoole dirrara arri gorsi Qamade latishshinni afi`noonni duushshanno guminnino Xaphoomu Ministirchi Dr Abiy Ahimed luphiima massagote murci’raanchimma, qinaabbino womaashshu irkonna gobboomu Qamadete gorsi pirojekite qineessitanno borro mini diriirasi luphiima qeecha baraarsinota gobboomu arri Qamadete latishshi Somaalete qoqqowira faajje ikki yannara coyi`rino.
Ministirchu hattenne yannara; 2015M.D arri gorsi Qamadete pirogiraame gobbaydinni e`anno Qamade gobbate giddo lattanno Qamadenni riqiwa; loosu kaayyo kalaqanna ikkado laalcho giwirinnu industirrara shiqishate illacha assitino. Hattono gobbaydi woxu soorro eo lossano hedote giddo worroonni yiino.
Gobboomu deerrinni tayxe arri Qamadenni 1.3 miliyoone hekitaare baatto latisatenni 52 miliyoone kuntaala Qamade afi’rate mixo amandoonni. Kunino gobbate giddo horonsi`nannita wo`munni wo`ma wonshatenni sae gobbaydi daddalira shiqisha dandiisiisannota huwachishanno.
Gobboomu deerrinni dirunnihu Qamadete laalchi hasatto 107 miliyoone kuntaala iillannoha ikkanna, qoqqowubbate mashalaqqe garinni tayxe gidu laalchinni 101 miliyoone kuntaala Qamadete laalcho; arri Qamade latishshinni ledo ledamanno woyte 153 miliyoone kuntaala Qamade afi`nanni yine agarranni. Kunino gobbaydi dikkora shiqishate dandiisiisanno tirfino laalchi hee`ranno. Kuni qole gobbate giddo horonsi`nannita wo`munni wo`ma wonshatenni sae gobbaydi daddalira shiqishateno dandiisiisanno yiino.
Gorsunni latanno 52 miliyoone kuntaali Qamadete laalchi giddonni ajanni ajeenna 26 miliyoone kuntaala gobbaydi dikkora shiqishate dandiisiisanno tirfino laalchi nootano coyi`rino.
Abbebech Maatewoos
Bocaasa 1, 2015 M.D Hamuse
