Addis Ababa:- Itophiyu wolootta gobbuwanni ledo noosehu dipilomaasete xaadooshshi gobboomitte horonna gobbate ayirrinye agarsiisinoha ikka hasiissannota Hawaasi yuniversitera kalqoomu xaadooshshinna Alumini hajubba dayirikitoreete dayirikitere kalaa Yohaanan Yookamo egensiisi. Kalaa Yohaanan baxxinohunni Itophiyu pireesete uurrinshara xawisino garinni; xaa yanna Itophiyunnihu dipilomaasete dhuki lexxanni daynoha ikkirono; gobboomu deerrinni jajjabba latishshu pirojektubba loosantanni noota la’inorinna Itophiyu lopho hasidhannokkiri mite mite galchimi gobbuwano hasiisannokki garinni Itophiyu aana xiiwo assinanni gede wo’naaltanni afantannota coyi’rino.
Baxxinohunnino, Abbay kofatto loosi gumulamannokki gede hasidhanno daafira kalqoomu mootimmuwanna uurrinshuwa Itophiyu aana dipilomaasete xiiwo kalaqanno noonsa hasatto gumulantannokki gede gobbate giddono ikko gobbaanni Itophiya riqibbe dipilomaasete looso loossanno bissa gobboomitte horo agarantannonna gobbate utuwimma ayirrisiinsanni garinni loossara agarannitano huwachishino.
Konni albannino ikkiro Itophiya gashshitanni sa’u bissa gobbate horonna utuwimma sayisse uytukkinni keeshshansanni gobbanke waajjuullu kadote gashshootira anga uytukkinni keeshshitinota kaysinohu kalaa Yohaanan; xaa yannara gobba gashshitanni noo bissano Itophiyu gobboomitte horonna ayirrinyi daafira yekkeerote shiqinshannire ikkinokkita leellishshanni afantannota kulino.
Itophiya babbaxxitino doogganni sakaalte kadote gashshooti hundaanni tuggasera hasidhanno wolquwa haammattino yanna ikkiturono; gobbanke kayinni tenne yannara duuchante latishshunna dipilomaasete handaarranni kaajjite loosatenni duucha ragaanni dagganno xiiwo qeelletenni sa’anni afantanno yiino.
Xaa yannara kalqoomu uurrinshuwara Itophiya riqibbe yekkeerantanno bissa amaddino uurrinshanna assitanni noo wo’naalshi ajinoha ikka hoogirono konninni roore loosa agarrannitano kalaa Yohaanan lede xawisino.
Miinju dipilomase ragaannino la’niro gobbaydi investimeente goshooshate; Itophiyaho babbaxxitinota dikkote hasattuwa injeessate hattono gobbaydi liqoonna irko hasate jawa qeecha afidhinota coyi’rino.
Mito woyte xiiwo batidhanno yannara kalaqantino jiffa qeelle sa’’ate jawa kaayyo gede horonsi’ra hasiissanno. Xaa yannara gobbaydi xiiwo batidhe heedheennanni kayinni gobbanke giddoydi qarrubbano tirtanni sagaletenni umose dandaate assitanni noo wo’naalshinnino jawa latishshaati la’nanni hee’noommohu yiino.
Kuni yaa meessiha giddoydi laalchimmanna miinja meessinni lossi’ra dandiiniro gobbaydi xiiwo gargadhate dhuka kalanqanni doogooti yee; gobbaydi bissanni jawa xiiwonna hekko heedhurono Itophiyu kalaqantino qarrubba keeru doogonni tirantanno gede assatenni meessiha giddoydi dhuka kaajjishi’nanni gede baca kaayyo kalaqqino yaanniiti coyi’rinohu.
Tenne yannara gobbaydi investerooti Itophiyaho dagge babbaxxitino handaarranni bobbahate noonsa hasatto lexxitanni daase kaiminni gobbanke handaarunni garunni kalqoomu dagoomira egensiisa dandiitanno dipilomaate hasiissannotano hattonni.
Amsaalu Felleqe
Bocaasa 1, 2015 M.D Hamuse
