Addis Ababa:- Sidaamu qoqqowi bareedda gobbate gargarooshshu olantora 39 miliyoone birri ale hendanniha woxunna danunni irko assino.
Qoqqowu mootimma tenne lamalara irko assitu yannara qoqqowu pirezidaantichi kalaa Desta Ledamo coyi’rino garinni; qoqqowu daganna mootimma konni albaannino bareedda gobbate gargarooshshu olantora hasiissanno irko assitanni keeshshitino.
Amandoonni lamalarano 29.2 miliyoone birri ale hendanniha danunni hattono 10 miliyoone birra xaphoomunni 39.2 miliyoone birra hendanni irko assinoonnita coyi’rino.
Gobbate keerenna mittimma agarate gobboomitte yawonsa fultanni afantannori bareedda gobbate gargarooshshu olanto dhuka kaajjishate qoqqowu mootimmanna daga babbaxxitino irko assitanni keeshshitinota tenne yannara xawinsoonni.
Gobbanke gadachante e’inohu Aliyye qooxeessi gaance keeru hasaawinni tirranni gede Federaalete mootimmanna HWHT qodhaano mereero iillinoonni sumiimme gobbanke keerenna mittimma hegersatenna dagate mereero mittimma kaajjishshannote yiino.
Hakkiinnino sae gobbate giddoydi hajonna qarrubba korkaata assatenni gobbanke diigate hasidhanno wolquwa saalfachishshinonna gobbate utuwimmanna ayirrinye ayirrisiissanno sumiimme ikkitinotano pirezidaantichu coyi’rino.
Bareedda gobbate gargarooshshira assinanni irkonni ledo kalaqantino gaancenni gawajjamino jajjanna qooxeessuwa wirro gatamarate loossarano qoqqowu mootimma dagatenni ledo halante agarrannise qeecha fultannotano pirezidaantichu Desta Ledamo tenne yannara xawisino.
Irko wo’mante qoqqowu dagawiinni gamba assinoonnita xawisinohu pirezidaantichu; wo’manta qoqqowu dagaranna irko assitino bissara galatasi shiqishino.
Amsaalu Felleqe
Bocaasa 1, 2015 M.D Hamuse
