Abbebech Maatewoos
Addis Ababa:- Cancishaano HWHTnni aliyye hajajo kakkalamaano aana gumulantino barshe qaagatenni dhaggete maganyenke fulleemmo yite mootimmate komunikeeshiine owaante egensiissu.
Birra 24/2013 M.D HWHT manchu beettiwiinni agarrannikki kakkachimmanninna kalqete barera leeltinokki finqilanni sannate yeedalate balera heedhanni agartannise keeshshitino aliyye hajajo olanto aana gawajjo gumultino barra lainohunni mootimmate komunikeeshiine owaante xawishsha uytino.
Cancishaano HWHT gobboomu soorro gedensaanni 27 dirrara hasidhu gede dagannita mannihimmate qoosso kakkaddanni keeshshite gobba tugganno moora gumultanni keeshshitinota xawishshunni kayissino.
Aliyye hajajo olanto 1990 M.Dnni hanafe ofollonsa Tigrayete qoqqowira assite lowo dirrara Tigrayete daga ledo heedhino, gobba agarro daga owaanto yitinoti; barra baatto loossanni hashsha agaraano ikkite haammata dirrara daafurrummo hifantummo yitukkinni, barra arrishsho hashsha qiidu cee`mishinsakkinni, hawadono arrono daafurtannoti muxxe Itophiyu ooso HWHT finqilu siqqonni gobba keereho yite goxxinnowanni qasantinota xawishshunni leellinshoonni.
Hatte gawajjonni batinye aliyye hajajo miilla barshaataame HWHT gawajjonni lubbante garunni nafa madaarantukkinni gotunna doowiru itinonsata, reeshshinsa aanano dibbe gantanni qeexaa`litinota, batinyu qole bisonsa hoogginotana woloottano fugante hudetenninna waay gooronni qorichishantanni shettinota, meyaa olantote miillano yannate wolqatenni siatantinota xawinsoonni.
Aliyye hajajo miilla rosu mine loosse qaaqquullu rossona yaansanni, fayyimmate mereersha loosse amuwunna qaaqquullu reyo ajinsho yaansanni, waay bale unte amuwa duqqitanni shettannokki gede assitinotera kakkachu HWHTnni baantoonninsa waagi xiyyita ikkinota xawishshunni kulloonni.
HWHT lemoo dirrara ale Tigrayete qoqqowira heedhanni aju daamoozisenni xe“isse woxe fushshite, anganna qotu madi`ra geeshsha kinna boccenna bayidhe rosu mine, fayyimmate mereersha, wedellu gangalatannowa ijaartino; hawadu sabba cee`mitukkinni baatto loosidhe galtinori gide shuquntanninna seekkitanni keeshshite; soodo qiida barra arrishsho waajjitukkinni iillino gide middanninna gantanni; qiishote giddo heedhanni agartinoseta; insa daafira lubbantinotanna madidhinota aliyye hajajo olanto finqilte qassino kakkachoota ikkitinotanna kakkachimma badooshshensa ikkitino duuru gaamo ikkansa xawishshu tittirshunni kulanno.
Cancishaano HWHT birra 24nni aliyye hajajo aana iillishshino gawajjo ikka hooggeennansa wolu olira diramatenni badhe higgannokkita ikkase leellishshinoha ikkanna 2013 M.D ella aganira mootimma ola uurrisate sumuumme assite olanto Tigrayete qoqqowinni fushshitu yannara halallate fincante noota qodhaanose gamba assite Affaaretenna Amaaru qoqqowubba hala`ladunni horratenni Itophiya diigate diimete geeshsha ha`ra hasiissusero hadhannota xaartanni haammata huno iillishshanni keeshshitinotano xawishshu aana xawinsoonni.
Cancu gaamo hanaffino horra bareedda olantonke jawaattino ganonni giggilte Affaaretenna Amaaru qoqqowinni fiidhe fultu woyte mootimma ola uurrisate sumuumme assite noo saatera maaja 18nni sayikki marro horrate ola fantinota leellishshino.
Cancishaano HWHT balaxxe aliyye hajajo aana suffeno Itophiy aana gumultino gawajjonna horra abbitino qarri techo geeshsha sufe Itophiyunna Itophiyu daga aana luphiima mannihimmate, miinjunna polotiku shetto hattono kalqoomu xiiwo iillishinoha ikkirono Itophiyu daga baalanta qeelletenni fultanni afantannota leellinshoonni.
Baalunku daga ledo ikkatenni assinoonni bayira sharronni HWHT umise qitiissitino olinni ba`ara jeefote gafa aana iillitinota leellishinohu xawishshu; kakkalamaanote gumi la“amannonna qeelleno qaanganni yanna aana hee`noonnita xawinsoonni.
Ninke maganye hambeemmore ikkinummokkinni roduuwinketa, Itophiyu ayirrinyenna gashshootu mittimma agarsiisate sharro qacce iillishate hasiisanno waaga baala bareendetenni baatate qixxaamboommoreeti.
Barshe kiirranni hee`neemmore ikkinummokkinni Itophiyu daga baxxinohunnino Tigrayete daga HWHT miiconna borrojjimmatenni wolasse fushshate baantoommotanna baantanni hee`noommo waaga kaajjinshe sufatenni jeefote qeellete rawo aana ikkine kakkalamaano qaanganni Itophiyanke ayirrisiinse cancishaano HWHT mooggo aana qeellenke dudumbeemmo yite mootimmate komunikeeshiine owaante xawishshunni egensiissino.
Bakkalcho Birra 24, 2015 M.D
