Yaareed Geetaachew
Hashshi mereerooti. Barru soodannohu lamalate loosu hanafanno umi barra Sanyo soodaraati. Sanyo! kolishsho sanyo sooddaraati. Birra 23/2013 maarote diri hashshi Birra 24 sanyo soodaraati. Ee,barru mitoho soodanno;mitoho so’ranno! disoodanno. Togo yaano mitoho keere soodanno mitu kayinni soodanno barra laikkinni tenne kalqe hakkaanni keerunni yaanno. Maalisi bushsha;foolisi kaaiiqisiwa!
Birra 24/2013 M.D hashshi mereero olantote miila ikke Aliyye hajajora keeshshino jaali’yara bilbila qilli asse hasaawanni noommonkanni. “Hiittooti dikeereholla gobba? Ane xa’mooti jaali’yano “keereholla;barra loosidhe galtino daga gide gamba assinanni honsoommo. Xaalla siikki assinannawe bilbilitto. Ama’ya dikeereholla?” Jaali’ya huurooti. Keereho yee dawaro qolummosikkinni huuro sammi!! Helo,heloo,heloo! Sammi! May kalaqamiro afummokkinni jaali’ya sammi.
Hakkuy gedensaanni goxichu mayira adhaera! Hakkunni lipheessi giddo umisi ayiddinni aliyye hajajo aana shigiggissanno gawajjo iillishi Juntu. Albansa dannu widira qolte ofollitino olantote miilla badhe’yaanni ayiddi’ya noo yite ofolturono. 20 diri ale wolqansanninna,woxinsanni owaattanni keeshshitino olantora cancishaanchu HWHT badhe wodhi.
Hakko hashsha masissanno odoo macciishshantu. Gobbannihu xaphoomu ministirichinna olu hajajaanchi Abiy Ahimed (Dr) Dagoomittete qoolisira kalaqaminore faajje assi. Hakkawoytenni gobbate televizhiinera “ETV” shiqe togo yii.
“Muxxe gobba’ya daga Yee;techo kaadaano Itophiyu bissa Itophiya qassino. Itophiyu tuucishshino anga,qansino unuuna ga’mantino. Sa’u 20 dirrara yeedaalate godi giddo hee’ratenni,gobba’ya,ayidde’ya,da ga’ya yite baca daga kakkalante,madidhe ,mundiite,daafurte,gobbansanna dagansa woxxitino gobbate gargarooshshu olanto techo hashsha Meqelenni hanafeaddi addi Tigirayete qooxeessira moromaanonna itissino anga ga’mitanno bissa tantantino wolqanni gawajjo iillitinonsa……”
Xaphoomu ministirichi konne yii lipheessinni hanafe dagoomittete qooli hashsha hashshaho yiikkinni babbaxxitino sokka amade timbiliqi. Hashshihunni 5 saate balla macciishamino konne masisanno duduwo macciishshinohuno macciishshinokkihuno soda geeshsha dagittete qoolira mashalaqqe tareessi. Tenne ikkito macciishshinokkiha ikka hoogiro hattenne saatenni hanafe goxinohu dino. Aanena mayi ikkaraatikka yaannohunni duuchunku umisi hedo woratenni duumba higinohu dino. Birra 24 maakisanyo soodara sanyote hashshi olantote kakkalama,olantote maatera yaaddonna wi’la,Itophiyu dagara dadillenna yaaddo tuge soodi. Ayirradda Itophiyu daga hiikkine hamboyya konne hashsha?! Hawo qahu!!
Soodasi digattannona aanino barri Maakisanyo 24 soodi. Hashsha baadiri iillinosikkihu soodo raadoone macciishshanno woyte Itophiyu dadillino! Wolu hasaawi dino. Aliyye hajajo aana TPLF iillishshino gawajjo mine minenko dadille fincitino. Oosose soqqitino ama hallose shaarbetenni usudhite umose kolishsho shaashenni biqqe xidditu. Illese shoolente faronni hidiiddo giggishshitu. Gobba moromaanotenni siyatantu. 20 diro bushsha uddidhe agartanninsa heedhino olanto badhensaanni ganantinota macciishshini. Ee,barru kolishsi’ri.
Barraho dikkote,sagaletenna loosu minnara hasaambanni hasaawi cancishaanchu HWHT badhe wodhe itissino anga,qansino unuuna ga’masi calla ikki. HWHT aliyye hajajo aana calla gawajjo iillishe ikkinoe di yiino. Layinkinna sayikki barra keeraano qansoota ugaaxe shigiggishanno garinni shaasi sufi.
Konne assoote abbooshshi’ratenni qoqqowubbate mootimma tuqu xaadooshshira shiqatenni xawishsha fushshitu birra 24/2013 M.D. Gorgarooshshu olanto aana iillinshoonni gawajjo ashshiishshu. Dagano ikkito abbooshshidhu. Cancishaano HWHT gaamo Itophiya diigate balaxxe olanto diiga noonke yite hanafatenni Itophiyaho daggino soorro aana kolishsho diqillo buurate keeraano qansoota shaatenni bushanna kakkachimmate assootensa suffu.
Hakkonne barranni Tigirayete qoqqowira wiinamu yanna lallawa lallambi;dagano,hettisamaano paartuwano sayinsoonni gumulo gara ikkase addi addi tuqu xaadooshuwara shiqqe xawissu.
Gargarooshshu olantora badhe wodhini gedensaanni layinki barra birra 25/2015 M.D bacu manni wodana goshooshinohu HWHT mootimma ikkite heedhu dirra giddo ugaaxanninsa keeshshino olantote miillara woshshatto assate.
Letenal Jeneral Baaca debele,Letenal Jeneral Abebaw taaddesehanna Letenal Jeneral Yohannis G/Mesqelihura woshshatto assinita dagano mite mite bissano mootimma galattu. Kuri olu mokonninnano woshshatto assininsa barrinni hanaffe addi addi olu basera leellishshino bareende assinoonni woshshatto gara ikkase leellishshino.
Aliyye hajajo aana iillishshino gawajjonni HWHT uminsa anga angansanni murtu;dagatenninna mootimmate wiinni babbadantu. Mootimma “Seera ayirrisiisate gaado” yaannohunni reemboonni gawajjo taxi assitu. Mootimma seera ayirrisiisate gaado yite hanaffu yannara nooti dagatenna addi addi uurrinshuwa irko techono badhe dihiggino;techono naqaashete. Gobbate giddonna gobbaanni heedhanno Itophiyu qansooti qaccetenni qaccete geeshsha dira fulatenni irkonsa leellishshino;cancishaano gaamora noonsa gimbeno hattonni.
Hattenne yannara kalaqantino ikkito giddonni ayino hawannokkiri gargarooshshu olantora dagate giddonni kakaqamino ayirrinyeeti. Yaadegi yannara polisetenna gargarooshshu olanto badooshshu uddano uddi’noha la’nanni woyite hinko ga’mi’nanninkanni. Olanto agaraano ikkitukkinni shitannore labbannonkanni. Kayinnilla hakku barri olantote aana noo laooshsheno soorri.
“Mundee’ya Olantonkera” yaanno mundee aatenni hanafe buxichunni dureessu geeshsha noo dagoomi gargarooshshu olantora assino irko leellishshannohu HWHT biilloonyu dirisinni mageeshshi geeshsha gobboomittete mittimma huninoro buuxisanno. Minise giddo mitte lukkicho noose mancho “Nooeti tenne mitte lukkiichootina eeggotena tenne lukkicho massitine olantote uyiyye’’e” yitino dhagge ayera hawantanno?! Kuni barri lamu raginni dihawamannonke. Umihu HWHT dannansa agare keeshshino aliyye hajajo aana bomba tuge gattinore Siino-tiraaketenni daahit. Layinkimeeshsho tenne gawajjo harunse Itophiyu daganna dagoomi booraawe keeshshinonna babbadamooshshu danqara hiiqqaqqe alba Adiwu waro xaaleena shorrate horonsi’rino mittimma wirro qole timinoti mamarono di hambeemmote! Birra 24/2014 M.Diro allaggu hawo ikkinniina Itophiyu daganna Itophiyu baxillaano giddo qaagamanni hee’ranno barra ikkino!!
Bakkalcho Birra 24, 2015 M.D
