Amsaalu Felleqe
Addis Ababa:- Gobbate gargarooshshu olanto gobbate utuwimmaranna daganke ayirrinyira gobbate qacce agarate gobba galte hossannoreeti; umonsano gobbatenna dagate uytinoreeti yaanni Sidaamu qoqqowi mootimma pirezidaantichi kalaa Desta Ledamo coyi’ri.
Pirezidaantichu Birra 24 juntu olantote aana iillishino hambannikki gawajjo lainohunni Bakkalcho gaazeexira xawisino garinni;Olantonke martuwa baala dagate ledo noonsa baxilli kaiminni olu nookki yannarano woxensa, wolqansanna egennonsa dagate uytanni; Tigirayete qoqqowira loosidhe galtinori gate shuquntanninna laalchonsano yanna agarte gamba assitanni keeshshitino wolquwa; hattono 20 dirrara agartanninsa keeshshitinore badheenni higge barshe loosansa dhagge gatona yitannokki assoote ikkasi kaysino.
Ikkollana, olantonke hedeweelcho ganonni kakkalanturono; cancishaanchu HWHT qodhaano ganonna hasatto garinni ikkikkinni dagate halammenninna jawa bareendenni techo geeshsha gobbate mittimma agarante iillitinoha ikkasinni ayirrinyunni kakkalantinore ikkansanni Itophiyu daganni duuchanka woyte qaagantanni heedhanno yiino.
Birra 24/ 2013M.D gobbankera gargarooshshu olanto aana kalaqantino ikkito ayee woyteno hambara dihasiisanno yiinohu pirezidaantichu; ayirrinyunni kakkalantinore qaanganni gobba agartanni noo olantonkera kayinni duuchanka woyte badhe ikka noonke yaanni huwachishino.
Gobbate gargarooshshu olanto Aliyye hajajo aana juntu hedeweelcho ganonni barshe iillisheenna dagatenna gobbate daafira kakkalanturono; hakko barrinni hanafe kayinni gobbate mittimma kaajjitinonna dagankeno mittimmatenni ka’e; mittimmansa wolqa assidhe giddoydinna gobbaydi diinna gobbanke diigate hasidhannore kaajjillunni sharramatenni diinna barbadeessite gobba mitte assitino.
Olantonke aana iilla hasiissannokki gawajjo kalaqanturono; hakku barri kayinni gobbanke diinnatenni diigamatenni gatate hanafote barraati yine adha dandiinanni yiino.
Kalaqantino ikkito lowoti mannu lubbo kakkalantanno gede korkaata ikkirono; Itophiyu mittimma agarsiisate ragaanni guma abbanni noohanna qeellete widira reekkammanni hee’noonniha ikkasinni lubbote waaga baattu roduuwinkera jawa ayirrinye aa hasiissannota qummeessino.
Sidaamu daga ayee woyteno gobbate mittimmara gaadaanote yiinohu pirezidaantichu kalaa Desta; diinu gobba meexi yannarano oosonsa maassidhe soyaatenni kayse woxensa, wolqansa, mundeensa hattono jajjansa gargarooshshu olantora irko assatenni gobbate mittimma hegertanno gede qeechansa fultanni afantanno.
Gobbatenna dagate gede kadde gashshate hasidhanno wolquwa effi’ne gimbannire ikkitanna daganke gobba diinunni gatisate hala’ladonna kaajjado sharro assitanni keeshshitino yee; albillichono Sidaamu mittimmasi kaajjishi’ratenni gobbate agarranni qeecha fulannota qaagiisssino.
Bakkalcho Birra 24, 2015 M.D
