Abbebech Maatewoos
Addis Ababa:- Cancishaano HWHT aliyye hajajo aana gumultinoti finqilate gawajjo gaamo daga gibbannotanna Itophiya mishshannota ikkansa faajjetenni leellishshannoha ikkasi gargarooshshunnihu dagate xaadooshshi dayirekiterchi koloneel Geetinnet Adaane xawisi.
Gobbate gargarooshshi olanto ha`lamaano daga ledo ikkite Itophiyu bayirroonye mamooteno kisiissannokkita coyi`rino.
Gargarooshshu ministere dagate xaadooshshi dayirekiterchi koloneel Geetinnet Adaane; cancishaano gaamo gargarooshshu olanto aana finqila gumultino barra Birra 24/2013 M.D layinki diri qaaggo lainohunni gaazeexu xawishsha uyno.
Xawishshisinnino barra babbaxxino dagoomu kifilla qaagge hossannota xawise; gargarooshshu xaphoomu biddishshi widoonninna olanto noowa baala babbaxxitino amanyootubbanni qaagame hosannota coyi`rino.
Birra 24/2013 M.D cancishaano gaamo gobba diigate assootensa faajje assitino barraati yinohu koloneel Geetinnet; gaamo gumultino finqilate assootinni daganna gobba gibbannota ikkansa assootinsanni farcishiishidhinota xawisino.
Cancu gaamo balaxxe qixxaabbe labbino saatenni aliyye hajajo badheenni qasatenni gumultino gawajjo gobbankera agurrena kalqeteno wosincho ikkino assooteeti yiino.
Gargarooshshu olanto umisera albaanni daga balaxisiisse gadachose ikkadimmatenni fultanno dagate oosooti yiinohu kolooneel Geetinneti; cancishaano HWHT kayinni dhagge gatona yitannokki bunshe gumultinonsa yiino.
Olanto Tigrayete qoqqowirano coi`tte olantote amanyootinna daga ayirrisatenni 20 dirra ale sokkonsa fultanni keeshshitinota xawise; mallayyonsa uddidhinonna daga`yaati yite ammantinorinni finqilamansa lowo geeshsha mararsitanno yiino.
Assootuno Itophiyu dhaggete borro giddo bunshetenni qaagamannoha ikkasinni barra qaangeemmo woyte togoo dani huno wirro gumulantannokki gede huwachishate ikka noosi yiino.
Itophiyu daga olantote aana birra 24ni iillitino barshe la“atenni qotenke ikkite ha`lamansa farcishiishidhino yinohu koloneel Geetinnet; techono qotenke ikkansanni ayirrinyu macciishshamannonke yino.
Olantono irkisaano Itophiyu daga ledo ikkite gobbate bayirroonye agarsiisate loosunni farcishiishidhanni noota kaysatenni olanto hiittee wolqano ikkadimmatenni sharrama dandiitanno uurrinshi aana noota coyi`rino.
Cancishaano HWHT gaamo gargarooshshu olanto barshetenni doddoltino barri birra 24 layinki diro techo baalante gobbuwara “Birra 24 mamooteno dihambeemmo” yitanno massagote hedonni qaanganni honsanni.
Bakkalcho Birra 24, 2015 M.D
