Albi yannara mittu mootichi noonkanni. Isino maganu uynosiha mootimmate looso agure maatto egennino manna woshshiishanni maatto macciishshanni hosannonkanni. Maatto egentinori baasu mannooti dagganni maattonsa kulte gudde hadhanno.
Mootichu kayinni yanna yannantenni maattote noosi baxilli lexxanninna kaajjanni sufi. Barrunni mitto barra woraqatasinna kuulasi shiqishe ani ikkinoe yaammo geeshsha haaro maatto kulannoe manchi afamiro beetto`ya adhanno; mootimma`yano ragiseemmosi yee maattamasi gani. Tenne yinohu kayinni maatto egennino manni diafamanno yeetinkanni.
Hakkunni gedensaanni duduwu gobba baala iilleenna mittu busulchu manchi daye ani mootichaho ikkinoe yaanno geeshsha maatto kuleemmosina kullesi yii. Mootichuno macciishshi yannara lowo geeshsha hagiidhi. Sheemaxxino woraqata uysi. Konni gedensaannino maattosi kula hanafi.
Mooticha! Mittu dureessu manchi wixi`no gidi dancha gede ikke iillisi; dancha gede ikke iillinosita la“i gedensaanni qamade duunannota hala`lado qaficho loosi`ri, qafichote seendillino sajjoo cigileeti, hala`linyu lemooho hattono hojja tonnetenkanni.
Gide gamba assinihu gedensaanni qafichote giddo wonshe wori. Ikkolla ikkinnina iibbillu korkaatinni daanillu qasannokki gede yee diilallo e`ara shiima mhule fushshinonkanni. Hakkaanni hige mittu gooxaanchi mitto qamadete guma haa`re fuli yee kulisi. Mootichuno eeyyaxa yiisi. Qole wolu gooxaanchi e“e mitto qamadete guma haa`re fuli yiisi. Hakkiinnina yiisi. Xaano wolu gaaxaanchi giddora e“e mitto guma adhe fuli yiisi. Hakkunni gedensaanni mootichu ka“e techora ikkannonke ga`a qole godo`lineemmo yiisi.
Layinki barrano mootichu gute daye godo`litanno minira e“e ofolli. Manchuno shiqi, mootichuno macciishshate qixxaawi. Qoleno wolu gooxaanchi e“e mitticho qamadete guma adhe fuli yiisi. Tenne berono kuloottoetewe yiisi. Manchu qolannoti, mooticha! Qaficho hala`ladotewe, qamade digooffino yiisi. Mootichuno hanqe ka“annoti minisira e“i.
Sayikki barrano gute daye godo`litanno minira e“i, manchuno shiqi;mootichuno hanafi yiisi. Qole wolu gooxaanchi e“annoti mitto qamadete guma haa`re fuli yiisi. Mootichuno tenne macciishshi yannara tini bero kuloottoete, wole maatto dinohenni yiisi. Maattotero wo`mitinoe yiisi. Kayinni qamade mamoote gooffu. Qaficho hala`ladotewe yiisi. Togo yaanni tonaaonte barra wo`ma hifachishisi. Jeefoteno mootichu rosinonte gede godo`lanno minira e“e ofolli, manchuno shiqi, mootichuno hanafi yiisi. Qole wolu gooxaanchi e“annoti mitto qamadete guma haa`re fuli yiisi.
Mootichuno hanqe, barru tuqa tennella kulattoe? wole maatto noohero abbi yiisi. Mooticha`ya maattotero wo`mitinoe kayinni hanafoommota gudummokkinni wole hanafa didandeemmo. Qaficho lowo geeshsha jawate, qamadeno lowote yiisi.
Tenne coyi`rita mootichu lowo geeshsha hanqe layikkita tenne maatto kultootie lowo geeshsha hifachishshinoe. Beetto`yano oommohe mootimma`yano ragisoommohe yiisi.
Manchuno mootichunnita ilino beetto adhe mootimmano ragire billoonyu aana afolli.
Ooso`ya hasiisanno coye agurtine hasiisannokki coye hasidhinoonte. Haariimonna godo`le baasa baxxinoonte.
Bue:- Geetaharuy Weldesillaase
Abbebech Maatewoos
Birra 17, 2015 M.D Hamuse
