Sigaara wiliishshi`ra iillishshanno gawajjo ka`anno woyte batinyunni shombu aana iillishshanno gawajjooti balaxxe qulli yitannonkehu.
Lawishshahono tenne hajo lainohunni 2 kumi mannooti xa`mante xibbuunni 18% sigaara wiliishshi`ra ballimma abbitannota garunni affinota coyidhinoha ikkanna; xibbuunni 76% ikkitannoti kayinni illete aana iillishshanno gawajjo daafira affinokkitaati gamba assinoonni taje leellishshinohu.
Biriitaaniyu xiinxallaano kayinni fushshitino haaro tajenni sigaara wiliishshi`ra shombu aana iillishshanno gawajjonni gobbaanni illenke aanano ballimmate geeshsha iillishanno luphiima fayyimmate qarra hoodisara dandaannotaati egensiissinohu.
Xiinxallaanote xawishshi garinni ikkiro sigaara aye woyte wiliishshidhanno mannooti wiliishshidhannokkiri ledo heewisantanno woyte wiliishshi`raano ballimmate reqecci yaate kaayyonsa lame eronni luphi yitinote.
Korkaatuno qole sigaaru giddonni fultanno wiliile illenke aana kalaqantannota fayyimmate mitiimubba iibbabbishshannohuraati yinoonni.
Sigaaru wiliile hadhaame ikkitino kemikaale giddose amaddinote yinoha ikkanna; kuni qole illenke shotu garinni gawajjote reqecci yitanno gede doogo fananno yeeno kulino.
Ledoteno sigaara wiliishshi`ra sukkaarete dhibbi ledo amadisiisame kalaqamannoha la“ate qarra roore iibbabbishshanno yinoonniha ikkanna; kunino illenke reetiinira badheenni noota mundeete boombuwa loosu gobbaanni assatenni ikkinotano xawinsoonni.
Konni kaiminninni xiinxallaano tirote yitino hedo amadisiisse wortinoha ikkanna; kuri giddonnino qaru sigaara wiliishshi`ra agura woy uurrisanna yanna yannatenni illenke fayyimma agarate yinoonni.
Birra 17, 2015 M.D Hamuse
