-Olu Korkaatinni Gawajjantinore Fayyimmate Uurrinshuwa Wirro Uurrisatenna Buqqeete Gatamarshi Aana Lowo Loosi Agarannota xawinsi
Gobbate kalaqantino dano bejettete dirinni fayyimmate handaarinni gumulate amandoonni mixo aana xiiwo kalaqqinoha ikkirono fayyimmate iillo wo’munku handaarinni rakkinota assatenna amandoonni mixo gumulsate safo tuggino loossa loonsoonnitanna jawaachishanno guma borreessiinsoonnita fayyimmate ministircho dokter Liya Taaddeseti xawissino .
Ministircho 24ki gobboomu fayyimmate handaari diru gambooshshi aana gumulami bejettete diri ministerete loosu jeefishshinna aantino mixo rippoorte Hawaasi quchumira xaadde shiqishshinoha ikkanna; gumulami bejettete dirinni baxxinohunni fayyimmate owaante islanchimmanna iillo, tajete amadooshshi, fayyimmate womaashshi sufo, fayyimmate massagooshshi woyyaambenna kakkaooshshu noonsare handaaru ogeeyye kalaqate aana illacha tunge loonsanni sa’noonnita egensiissino.
Konninnino 6 qoqqowubbara 15 fayyimmate keelluwa iillo halashshinoonniha ikkanna fayyimmate ekstenshiine dhuka bowirsate baxxinohunni amuwunna qaaqquullu fayyimma agarooshshi aana 27 kume ikkitanno ogeeyyera qajeelsha uynoonnita ministircho qummi assitinno.
Konni gobbaanni quchumu fayyimmate ekstenshiine qixxaawonni 1.4 Biliyoone ikkitanno daga addi addi owaante afi’ra dandiitinota ledde kayissino.
Amuwunna qaaqquullu fayyimma lainohunni bejetete dirinni 13.5 Miliyoone ale ikkanno meenti maatete damboowishshi owaante afi’ra dandiino yitinnoti dokter Liya; xibbuunni 69 anga ikkanno amuwi ilate harunso afi’rinotanna 68 anga xibbuunni ikkannorino ilate owaante qajeeltino ogeeyyenni afi’rino.
Qiddist Gezageny
Birra 17, 2015 M.D Hamuse
