Ganshu aliidita foo’linanni bisu kifile gawajjanno Vayiresetenni daanno dhibbaati.
Togo yaa Sano, Afuunnita giddoyidi kifilenna Kokke gawajjitanno shota mada ikkinota giddoyidi xisso xagisaanchi dokter Biiniyaam Mellesehu FBC ledo assino hasaawinni xawisino.
Mitto sayikkiha ikkanno ganshino ‘’RINO’’ yinanni Vayiresenni daannota coyi’rannohu xagisaanchu woloottuno haammata gansho amadisiissanno Vayiressa hee’ransa kayisino.
Vayiresootu taraabbannoreeti yaannohu dokter Biiniyaami; duucha woyte hee’neemmo, loonseemmonna hodhishshaho horonsi’neemmo qooxeessuwa ruukkado ikkituro shotunni mittunni wolunniwa taraawanno yino.
Ganshu dhibbi malaattano Sanote qooxeessira du’namaanchu hee’ra, giirate, buusanote, sa’e sa’e shota iibbabba, qiidisanna hakkiinni sairo luphiima iibbabbanna mikitate xisso ikkansa coyi’rino.
Ikkollana kuri malaatta ganshunnire calla ikkitukkinni woloottu vayiresetenni dagganno xisso malaatta ikkitara dandiitannohura xagisaano amaa’la hasiissannota qummeessanno.
Xaginaate lainohunni mini giddo iibbadore agatenni, xissote korkaatinni kokke madidhuro woyyeessate malawo horonsi’ra, woyyeessitanno xagga adha, fooliishsho assi’ratenni malaatta keeshshitanno yanna haransa dandiinannita coyi’ranno.
Hattono xagisaanote hajajonni angannita shiroppe labbino xagga uynannitano dokter Biiniyaami lede xawisino.
Bakkalcho Wocawaaro 19, 2015 M.D
