Saaro Gelgelo yaamamanno. Ilame lophinohu Oromiyu qoqqowira Booranu zoonera, Meta Arba olliira ikkanna Borboru qixxaawote rosi mini giddo 11 kifile rosaanchooti.
Aye woyte qidaamete barra rosanno rosi mininni maatesi heedhannowa ha`rate 43 kiilo meetire hodha agarantannosi.
Maatesi heedhannohu Meta Arba yinanni olliiraati. Meta Arba, Meta Weyama woradi giddo afamanno shiima ollaati.
Saaro aye woyteno maatesiwa ha`ranno woyte olluu teesaano bilbilinsa giddonni hasidhanno kiiro fushshite bilbilate qarrantanna wadanchanno. Konne calla dikkino, fooliishshote maatesiwa sayisanno yannara qidaamenna sambata olluu teesaano bilbilansa amadde isiwa dagganni hasidhanno manchiwa bilbilannonsa gede xa`mitanno.
Konni daarifa “Ani konne ollaa dayemmmohu mitte lamala giddo mitte higeetilla, mayira ani noommokki yannarano ikkiro insa uminsa nabbabbe ajay ajeenna bilbila bilbi`la dandiitanno gede diasseemmo” yaatenni hedi. Tenne hedo olluu teesaanora shiqishannonsa woyte sumuu yitino.
“Qooxeessu dagoomi rosoho hasatto noonsa. Rosiiseemmonsa woyte dandaami bikkinni baqqi yite beeqqitanno” yaanno rosaanchu Saaro.
Saaro rosiisa hanafi dirira qoxeessaho afamannoha rosu mine horonsi`ra dandiinonkanni. Ikkollana qooxeessaho kalaqantino moolle korkaatinni teesaano wole basera darantu.
Kuni kayinni illachasi badhera diqolino. Olluu teesaano darante heedhanno qooxeessira gamba assensa rosiisasi sufi. Saaro xaa geeshsha qooxeessu teesaano sasu diri ale rosiisino.
Rosu koronu vayrese korkaatinni taxxi yee keeshshi yannarano isi rosiisa uurrisinokkita coyi`ranno. “Rosu mini cufamanno woyte olla`ya ha`re teesaano caalu hundaanni gamba assatenni rosiiseemmo” yaanno.
Xaa geeshsha 94 ale gaamaareeyye,123 qole dirinsa 5-30 geeshsha ikkanno rosaano fidale kiirsiisino.
Saaro rosaanosi ajay ajeenna fidale bada dandiitanno gede assino. Konninniino sa“e shota shallagote beehacha loosa dandiitanno gede rosiisinonsa.
“Konni dirinni anewa rosate 112 haaro rosaano borreessantino” yaanno Saaro.
Saaro maatesira lamalki qaaqqooti. Maatesi mereerinni rosu minira e“a dandiinohuno iso callaati. Saada ce`e galtanno maate giddo ilame lophinohu saaro haammata qarrubba sayisino.
Qooxeessaho wirro wirro higganni kalaqantanno moolle korkaatinni rosu mininni gatissasira dandiitanno korkaatta kalaqantinotano qaaganno.
“Maate`ya moollete korkaatinni noonsare baala hoogguta umo`ya rosiisate mudhe ka“ummo. Borbori quchumira afamanno fiixiwa ha`re roso`ya sufummo” yaanno.
Onte kifilera hee`re motore ofaate roso rosinota coyi`rannohu Saaro, looso loosanni lamala kifile geeshsha rososi xiiwinota coyi`rino.
60 diriti Lokko Saara Waaqo, sette ooso ama ikkitanna sasu agani geeshsha Saaro nabbawanna borreessa rosiisinoseta coyidhanno.
“Shoole ooso`ya mitteenni lede rosiisi`ranni noomma. Bilbili`ya giddonni su`manna kiiro bade fushsha bashsho didandeemma. Bilbilantuerono ayimma xa`meeti huwateemmahu; xa kayinni umi`ya bilbilu kiiro borreessanna nabbawe bada dandeemma” yaatenni saaro galattinno.
Bue:-BBc News
Bakkalcho Wocawaaro 12, 2015 M.D
