Mittichu manchi dirunni jawa ikkinohu onte Ooso anni no yinanni. Kuni manchi barrunni mitto barra ontenta Oososi gamba asse togo yaannonsa “Ani xa albi wolqaha di ikkoommo, jawaate loose allaa’le ka’a kawa dodate ani umi’yara qahummokkinni wolqa qakkeenae xa kune la’inannie gede ikkoommo. Xa kayinni ani ofolleemmo caale ragidhinanniri ki’neeti. Kunnira mitte dhagge kuleemmo’ne” yaannonsa.
Jawu jawahona insa giddonni mitto woshshe “Hanni mininni dodde tonnu dulli noona wo’manka haadhe abbi” yaanno. Abbinoha Onte dulla uulla wore gantoha mittoho mitto mitto anga wore “Hanni hiiqqaqqe” yaannonsa.
Maahoyye yite butuchite hiiqqaqqite fiinxare calla uulla tuggano. Tonnu giddo uulla wore gatinsoha onte dulla “Hanni xa Ontenka dulla mittimma amadine hiiqqaqqe” yaannonsa. Wedellu Oososi hiiqqate shellegante hoogge “Anna, hiiqqama giwinonke” yitanno. Anninsa, “Xa macciishe”e, mitto ikka hoogginiro diinu hatto butu butu asse cancananno’ne. Kayinnilla, mitto ikkitiniro shellegame hooge qeelle’ne isinni farciranno’ne. Kunira ki’ne mereero ayno babbadara dandaannokki mittimma ikkito!” yiinonsa. Mittimma- Lophotenna-Latishshaho-gaando!
Hexxotenni Sa`nanni
Mitte raadoonete qixxaawo aana heeshsho mitiinsitinoseti mitte mancho bilbilte lowo geeshsha qarrantinotanna heeshshote oolto caacceessitinoseta xawissanno. Tenne qixxaawo harunsanni noohu mittu maganu hee`ranni ammanannoikkihu bushu manchi manchote aana haariimara hasi`re qarraataame mancho heedhanno ollaa raadoonete mereershira loossanno oppireeterootiwayinni adhatenni borreessaanchosi addi addi sagalenna woloota coyebba hirte massitaseranna ayeti soyinoehu yite xa`mitusero sheexaaneho yite kulise yaatenni soyaannose.
Borreessaanchono sonkoonnise ollaa haratenni hattenne qarraataame mancho xaaddannose. Hakkiinnino sonkoonnise baraarsha uytanni “kayinni ay soynohero afootta? Yaatenni xa`mitannose. Manchono togo yitu “Beetto`ya! Maganoho baalunku hajajamannosiwe. Isi hasi`riro sheexaaneno ikkiro soyaannohe” yituse. Borreessaanchono manchote ikkitonni wodana kisante wi`litu.
Heeshshonke giddo baasa hexxo mursiissannonna sa`nannikkita labbannonke jifo sa`nannita ammannummoro kaaliiqi kaa`lannonke.
Bakkalcho Woxawaajje 26, 2014 M.D
