Kaimisi maatiro garunni affinikkiinni badhete xissonni shettinoonni? badhete xisso danotenni calla kalaqantanno xisso ikka hooggara dandiitanno.
Ofoltinanni gari, horonsidhinanni koatte, bikkunni sa“ino kee`millinna ayirritanno uduunne kaysa aliidinna woriidi badhete xisso iillishshanno.
Meyaatenna labballu aana badhete xisso iillishshanno kaimu korkaatta tittirshunni la`neemmo:-
1.Biirote Barcimi
Biirote ofoltinanni barcimi badhete xissora luphiima qeecha amadanno. Ofoltinanni woyte ukkitinanniha ikkiro badhe`ne aana xiiwo iillishanno. Duguggurinke ligaamente wolqate aleenni bedeedanteenna diiskenke badhenke miqichi duuramanno gede assitanno. Yannate batinyinni kainohunni badhenke miqicho gawajjatenni badhete xissora reqecci yineemmo gede assannonke.
2.Wodhitinanni Koatte
Koatte badhe`ne fayyimmara luphiima qeecha adhitanno. Lekkate giddora eannokki woy gara ikkitinokki koatte sumbe uurrinannikki gede shokkishatenni mereerita giraaviitete bayicho sarraaqanno; kunino woriidi badhe`ne kifile aana xisso kalaqanno.
3.Goxxinanni Firaashe Woy Ma`na
Shaaltino firaashe horonsi’ra woriiditi badhete kifile giddoogge lixxanno gede assitanno. Ledoteno dugugguru miqqa sarraaqantanno gede assatenni mikittatenna miqqa xaaddanno base aana bedeedama kalaqantanno.
4.Badhete Suxxinanni Borsi
Badhete suxxitinanni borsi jawa ikkiro baca uduunne amadate kaayyo heedhannonne. Badhete xissora jawiidi korkaati badhe`ne aana bayidhinanni duhaati. Mitto widoonni noo bisi`ne kifile aana duha leda dugugguru miqqa ukkitanno gede assatenni badhete xisso kalaqantanno gede assanno.
5.Godowunni Goxa
Godowunni barxa yitine goxxinanni yannara badhe`neranna dugugguri`ne miqichi aana duha leddinanni. Dugugguru miqichi`ne aana wole duha leddini yaa qole wo`manta bisi`ne suude soorranno; umo`ne mitto widira qoltinanni woyte qole umo`nenna dugugguro`ne albi ragi gobbaanni assitini yaate.
6.Qote Woy Goowa Dugunuune Keeshsha
Seeda saatera goowa heeshshi yine woy dugunuunne keeshshanna hodha qotinke mereero noo mikitta laaffanno gede assatenni aliidita badhete kifilenna goowu xisso iillishanno.
7.Laappitooppenna Ismaarte Silkuwa
Kalqete aana noo mannooti baalunku horonsidhanno elektirooniikisete baxillinni ubbinohura kuri mannooti aana badhete xisso rosantinote. Loosunni amadantinanni yannara bilbila`ne qoti`nenna goowi`ne mereero amadatenni seeda yannara hasaawa goowu xisso iillishanno.
8.Bikkunni Sa“ino Kee`milli
Woloota xissuwanni ledotenni bikkunni sa“ino kee`miilli badhete, miqichu xaadannowanna mikittate xissora reqecci assannonke. Batinyu manni kee`millinsa korkaatinni daalletenna woriidi badhete kifilera xisso xaaddannonsa.
9. Lekka Sarraaqe Ofolla
Lekka`ne sarraaqqine ofoltinanni yannara dugugguru miqichi`ne suwa didandaanno; kunino daallete qooxeessira afantanno mikitta bikku aleenni bedeedantanno gede assannonsa. Ledoteno mundeete doyicho gufisasi korkaatinni vaarikoys veeyin / Varicose Vein/ yaamantanno xissora reqecci assanno.
10.Sigaara Wiliishsha
Sigaaru giddo noo niikotiine diskete widira hadhannota mundeete doyicho ajishatenni duguggurunna midashshu miqichi qarra iillishanno. Ledoteno kaalsiyeeme garunni bisinke ledo karsantannoikki gede assatenni miqichu lopho uurrisanno. Ikkinohurano sigaara wiliishshanno manni wiliishshannoikki manninni mitte eronni badhete xisso qarri xaadannonsa.
Bue:-Itiyo Xeena
Bakkalcho Woxawaajje 26, 2014 M.D
