Abbebech Maatewoos
Mittu geerchi mitti mittinke giddo lame hiyyeeyye mereero aye woyte harisamanno oli daafira beettisira togo yee kulannosi. “Umi hiyyeeyyicho bunshete akatoomi xawishshaati. Surrenke giddo hanqo, dadille, gaggaadaa`ma, yaaddonna bushate yinoonni hedo baala kalaqqanno.
Layki hiyyeeyyicho qole danchu akatoomi xawishshaati. Kuni kayinni surrenke, wodaninkenna nassenke giddo hexxo, keere, hagiirre, halaale, wolootaho beehanna dancha akatooma kalaqqanno.” Beettuno xa`mi, “Konni daafira ola ayi qeelanno?” annuno togo yaatenni qolisi, “Ati seekkite godowa duushshittohu qeelanno.”
Tini dhagge umonke buunxeemmo gede assitannonke. Xa`mo barru baala hiittenne hiyyeeyyichonna mageeshshi sagaleeti itinseemmohu? yitannote. Bushu akatoomi noonsa mannootinni umonke doyissinummoro heme, woloota gufisa, dogonna kapho hattono diigaancho hedubba lossi`nanni hee`noommohura mitte huluullo nookkiha bushu akatoomi noose hiyyeeyyicho jawaachinshanni hee`noommo yaate.
Kayinni yannanke danchummanna suwino laooshshi noonsa mannooti ledo sayinsummoro, dancha maxaaffa nabbambummoro, qarra tirranni furcho aana illachinshummoronna mannootu qarrubbansa tirtanno gede assatenni kaa`linummoro danchu akatoomi noose hiyyeeyyicho busha qeeltanno gede jawaachinshanni hee`noommo yaate. Seeda ikkitino heeshshonke qaafo giddo tini hiyyeeyye ninke akatooma riqibbanno. Korkaatuno jeefote akatoominke danchatenni woy busha hiyyeeyyichonni suudannona.
Bue:- Saykaddiis
Bakkalcho Woxawaajje 19, 2014 M.D
