Abbebech Maatewoos
- Bijaajote dhibbi maati?
Bijaajote xisso iiliidi gogu kifile xorrite e“atenni hakkonni quuphensa tugganni umonsa batissanno illetenni leeltannokki bijaajo abbitanno da`muulla widoonni daanno dhibbaati.
2. Bijaajote dhibbi malaatta maati?
- Hangaarsiisa, baxxinnohunni goxanote yanna
- Bisu gogi aana shiffi yitino malaatta leella
- Malaa amaddino darshenna madidhino bisu kifilla konni dhibbi malaattaati.
Geerrunna dhibba gargadhate dhukinsa woffi yiino mannooti bijaajo amaddunsarono hangaarsiisa hoogansara dandaanno.
Shifanna hangaarsiisa hiittenne gogu kifilera kalaqama dandiiturono baxxinohunni kayinni anga, qubbete mereeri, culunqate gaangaawi, saate usudhinanni qooxeessi, cigile erantanno base, unuunu, kikki`la, hallunna sirote qooxeessi shiffa kalaqantanno qara bisu kifillaati. Bijaajote dhibba yannantenni xagisa hoongiro gogu madi`ranna busu giddo qarra iillishshara dandiitanno. Konni daafira bisu aana kalaqamannoha hiikkonneno gogu qarra fayimmate ogeeyyenni la“isiisi`ra kasiissanno.
- Bijaajote dhibbi taraawanno doogga
Bijaajote xisso mannunni mannaho taraabbannohu tenne xissonni amadamino manchi ledo seeda yanna assinanni kikkisammenniiti. Ledoteno bijaajote dhibbi amadino manchita uddano, fooxa, daallasanna labbino coyebba gutunni horonsi`nanniha ikkiro taraawanno.
- Bijaajote dhibbira assinanni xaginaate
Bijaajote dhibbi xagichu noosi. Konne dhibba bisu aana ringanni woy afuunni egemminanni xagichinni xagisa dandiinanni. Ikkinohurano, qooxeessi`nera afamanno fayyimmate mereershira ha`ratenni fayyimmate ogeeyye amaa`le.
Ogeessunni hajanjoonni xagichi buudhinanniha ikkiro:-
- Goowunni kayse lekkate qubbichi geeshsha baalante bisu kifillara buudhine seekkine cuukka
- Baxxinohunni gogu eramannowa addi illacha assatenni buura
- Qiwaate ille kissannokki gede qoropha
- Xagichu 24 saate geeshsha bisu aana keeshshanno gede assinihu gedensaanni hayishshi`ranna co`itte uddanno uddi`ra
Ogeessunni hajanjoonni xagichi egemminanniha ikkiro qole:-
- Fayyimmate ogeessinni hajanjoonnisi manchi callu garunni adhanno gede assa
- Fayyimmate ogeessinni hajanjoonni bikka calla egemma
- Fayyimmate ogeessinni hajanjoonni barri giddo calla egemma
- Wolu manchira aa woy beeha didandiinanni
Xaginsanni yannara gumula hasiissanno coyebba
Ikkadu waay noo qooxeessa ikkiro:-
- Uddirantino uddanna wo`mantanni iibbino waayinninna saamununni hayishshine arrishshote aana haga
- Gaawe, naxala, ansoolla, diphanonna hashshi uddanna wo`mantanni iibbino waayinninna saamununni hayishshine 3 barra arrishshote aana haga hasiissanno.
Waay anje noo qooxeessa ikkiro:-
- Xagicho buudhan`nera albaanni woy egemma`nera albaanni uddirantino uddanna wirro uddira`nera albaanni 3 barri geeshsha arrishshote aana keeshshiisha
- Gaawe, naxala, ansoolla, diphanonna hashshi uddanna wo`mantanni wirro uddi`nera albaanni 3 barri geeshsha arrishshote aana keeshshiisha hasiissanno, woy uddanna 3 barri geeshsha festaaletenni gurdine addinni wora hasiissanno.
- Bijaajote dhibbi mannunni mannaho taraawonnokki gede gargarranni doogo Dhibbu amadinosi manchi ledo kikkisama hooga, kikkisama gadacho ikkituro kayinni kikkisamate albaanninna gedensaanni ikkadu waay hee`riro saamununni hayishshira, hattono hangarranni woyte mada lexxitannokki gede culunqe haranse mudha hasiissanno.
- Ikkadu waay hee`riro meessi co`imma garunni agadha yaano bisonna umo hayishshira hattono uddano yanna yannantenni hayishsha hasiissanno. Bijaajo amaddinosi manchi ledo seeda yanna kiirsiissino bisu kikkisama noonsari malaatta leella hooggunsarono buuxisiisi`ra noonsa.
- Bijaajotenni wirro amadama gargadhate kikkisamino manni baalunku mitte yanna giddo buuxisiisi`ranna xagisi`ra noonsa.
- Xagisi`nihu gedensaanni hangaarsiisate qarri sufiro rakkine qooxeessi`nera afantanno fayyimmate mereershubbara ha`ratenni fayyimmate ogeeyye amaa`la hasiissanno`ne.
Bakkalcho Woxawaajje 19, 2014 M.D
