Addis Ababa:- Qoqqowoho Hulatenna Alatta Wondi quchumi umi deerri Hospitaalla hundaanni gashshinanniri dagate xagga minna tenne lamalara maassinseenna dagate owaante aa hanaffinota Sidaamu Qoqqowi Fayyimmate Biiro egensiissu.
Qoqqowu Fayyimmate Biiro sooreette Dr Selaamaawit Mengesha tenne yannara xawissino garinni; xaggate anje seeda yannara danchu gashshooti xa’mo ikkite keeshshitinota kaima assatenni Fayyimmate Biiro 2014 bejetete dirinni qoqqowoho faafantanno fayyimmate uurrinshuwara xaggate anje tirate 60 miliyoone birra gaamatenni irko assinanni keeshshinoonni.
Qoqqowoho sase woraddara dagate xagga minna fanate mixo amande loonsoonniri mereerinni Hulate woradinna Alatta Wondi quchumi uminsa irkono assatenni tenne kaayyo horaameeyye ikka dandiitinota coyidhino.
Isilanchonna taalo ikkinoha fayyimmate owaante dagate iillishate Qoqqowu Fayyimmate Biiro jawa illacha tugge loossanni afantanno yitinoti sooreette; tenne yannanni lame dagate xagga mine fanne owaante uytanno gede assinoonnitanna sayikkiha dagate xagga mine Arbagooni woradira hasiissanno xagga hirre shiqinsheenna muli barruwa giddo dagoomaho owaante aanno gede assinannita qummeessitino.
Dagate xagga minna fannoonni woraddara dagoomu isilanchonna woyyaawa fayyimmate owaante afi’ranno yine hendannitanna dagoomuno xaggate minna uminsa jajji gede agarte horonsi’ra hasiissannota huwachishshinoti Dr Selaamaawit; tenne hajora illachishshe irko assitinno bissarano galatase shiqishshino.
Lamenta xaggate minna maassidhe owaante aa hanafisiissinoti Qoqqowu Amaale mini songaafitte Dukko Faantaye Kebbede ise widoonni; dagoomunniha seeda yanna qarra ikke keeshshinoha xaggate anje tirate ragaanni kuri xaggate minna qeechinsa jawa ikkinota coyidhe; baalante latishshu halamaano ledo qinaambe loosatenni qoqqowoho dagoomittenna miinju handaarrannino dagooma horaameeyye assa dandiinoonni yitino.
Songaafitte amadisiisseno; dagoomaho owaante uytanno gede fannoonniti xaggate minnara xaggate hafanfarre kalaqantannokki garinni horonsi’ra hasiissannotano huwachishshino.
Wole widoonni Qoqqowu fayyimmate biiro ‘’Danchumma Uminkera’’ yaanno massagote qaalinni gobboomunni hattono qoqqowu deerrinni taraawannokki dhibbinni dagoomu gawajjamannokki gede assate fayyimmate uurrinshuwa baatooshshiweelo buuxote owaante uytanni afantannotanna dagoomuno qooxeessinsara afantanno fayyimmate uurrinshuwara owaante afidhanno gede woshshatto assinoonniha ikkanna 20 barrira keeshshanno danchummate loosinni teesaano mule mulensa afantanno fayyimmate mereershuwara maratenni manninaatense baatooshshiweelo buuxi’ratenni umonsa xissotenni gargadhitara sokka sayinsoonni.
Danchummate loosinni fayyimmate qarra buuxa calla ikkikkinni tenne lamala giddo Alatta wondi woradira afantanno qarraataammu qarraataamma bande galtanno mine gatamaratenna irko assate loosono Fayyimmate biiro faajjetenni hanaffino. Konni hanafoonni babbaxxino danchummate loosinni 10 kumi ali daga fayyimmate owaantenninna addi addi irko hasiisannonsare kaa’latenni biiro qeechase fultannotano buuxinsoonni.
Amsaalu Felleqe
Woxawaajje 19 , 2014 M.D
