Abrahaam Saamueel
Addis Ababa:- Ga`a gobba gashshate wedellaho timo hee`ra hasiissannonsata XM Dr Abiy Ahimedi xawisino.
XM Dr Abiy Ahimedi, “Ninke Diri Wedellu Qeechi” yaanno uminni harinsonni gobboomu deerrinni filante daggino wedelli xaphishshu battalara wedellu ledo keeshsho assino. XM wedelluwiinni shiqqino xa`mora dawarono qolino.
Itophiya qarrunni mitii`mirono, allamurchu gede wolqasi haaroo`mitanna gottiimmu baychira higganno gede, woffi assannonkere bande biddi assa hasiissannotanna konnirano wedellu qeechi luphiima ikkinota xawisino.
XM Dr Abiy, wedellu ga`a hexxonsa tunsiissanno bissa horontanni fajjannokki gede, dagoomu mittimmara jawaatanna gobba gashshate qixxaawa noosi yee woxaratto assino.
Kaphu duduwiinni yannanke gooffankunni, dancha coyee hasi`rate, Jireenya, keerenna mittimma abba hasiissannota coyi`rino.
Loonsanni hee`noonni latishshu pirojekte baala ga`ara hexxo ikkino wedellira ikkitanno gede mixi`ne loonsanni yiino.
Gobba adhitine gashshate ki`ne wedellaho timo hee`ra hasiissanno`ne yiinohu XM; ollaa agure gobba, qoleno Afirikanna kalqe massagate hasiisa`none yiino.
Buqqeete tii’’inninna hedotenni gotti yiinoha ledamate ilama ikka hasiissannota huwachishino.
Qoqqowaho loonsanni hee`noonni latishshi sufannoha ikkinotanna, danchu gashshooti danqara ikkinoha moora hunate loossa kaajjite suffannota xawisino.
Amadiise, wedellu ga`ara gobba riqibbannore ikkitino daafira, angansanna wodaninsa co`ichanna keereencho ikka hasiissannota xawisino.
Saiha shoole diro mereerima uurrinsha ijaarate, dimokiraasete uurrinsha kaajjishate, latishhsu looso loosate, gashshootu qoqqowa su`mate widoonni haammata lossa loonsoonni. Konnira, wedellu tenne sharrora biso ikkinota egensiisino.
Wole widoonni, “Itophiya gottiimu baychira iillinsheemmo yineemmo yannara, halalaanchu coyinni ka`neeti” yiino Xaphoomu Ministirchi.
XM Dr Abiy Ahimed, wedellu qeechi gobbate keeriranna lophote yaanno gambooshshi aana hasaawa assi yannara xawisanni, kalqete xiiwo kalaqate assinanni doogo mereero qaru qaru umma, gargarooshshu, dipoloomasetenna, miinju dhukaati yiino.
Albi yannara, Itophiyu olantote dhukinni, dipolomaasetenna miinjunni wolootu kalqete gobbuwanni keenniro xiiwo kalaqqannotenna gottiimu baychira ofoltanno gobbaati.
Xibbu diri kawa noota Itophiyu dhagge nafa la`niro Afiriku, Isiyunna wolootta gobbuwa kado dandaa hoogge kadotenni kadante galtino. Itophiyu kayinni, Aduw olinni qeelle adhite keere fultino. Qeela calla ikkitukkinni wolootu Afiriku gobbuwano keere fultanno gede amaaltino; irkissino, qajeelsitino. Kuni olantote loosi wolootu gobbuwanni woyyaabbino gobba ikkitinota leellishanno.
Itophiyu, Kooriyunna Kongote keere abbate olantote wolqa bobbakkanno gede assitinohu wolootta gobbuwanni olantotenni woyyaabbino daafiraati yiinohu XM Dr Abiy, Kooriyahonna Kongote olantinori Itophiyu olanto keere ayirrisiisanno olanto ikkite, qajeeltino gobbuwanni roorte bareendetenni xaa geeshsha su`minsa ka”anno gede assinota xawisno. Kunino, Itophiyu albi yannara olantote dhukinni gottiimu baychira ofollinota xawsino.
Dipolomaasete widoonni, xaa yannara Halantino Mootimma Uurrinsha yine woshshinanniti hattenne yannara ‘League Of Nation’ yinanni uurrinsha giddo mitte callase miila ikkitinoti Itophiyaho. Afiriku Mittimma xintini yannara sase xintitu gobba giddo mittenna albisaancho Itophiyaho. Hattono, Itophiyu viisa amadinohu baalu, boode yanna giddo qajeeltino gobbuwano ikkito ayii gobba viisa shotu garinni gannannita Dr Abiy qaagiissino. Kunino, dipoloomaaste loosinni woyyaabbinotanna xiiwo kalaqannota ikkitinota leellishannota xawisino.
Miinju widoonni, techonni 60 diri albaanni Duumo Garba sa`e Hajji hadhanno Itophiyu daga, birre doolaarete gede horoonsidhe dikkidhannota qaagiissino. Hattenne yannara kalqete ayiriinye uytanno gobba giddo Itophiyu mittoho.
Xaa yannara konne coyee basesira qolate ka`no yaanni yiinohu XM Dr Abiy, Itophiyu daga noonke dhuka horoonsidhe shiima yanna giddo gottiimu baychira iilla dandiineemmo yiino. Baxxinohunni, wedellu albi mitimma, baxillenna ayirrinye wolte Itophiyu Jireenya shiima yanna giddo qola dandiineemmo yiino.
Wole widoonni XM Dr Abiy, 12ki kifile guddino rosaano fajjonsanni qooxeessinsanni fulte wole gobbara hadhe meessi fajjo looso dagoomaho uytanno owaantete doogo amuraate diriirsate hendoonnita kule; mootimmatenna hallanyu uurrinsha fano loosu baycho fushshitanno yannara konni amuraati giddoonni sa`ino rosaano mittu safaraanchi gede assine la”a dandiinannita coyi`rino. Kuni tenne yannara shoshshogganni daynoha gobbate mittimma wedellu kaajjishate dandaannota buuxisino.
Gobbasi buuxe afinokki wedellichi massage diafanno yiinohu XM Dr Abiy; albillicho 12ki kifile guddino rosaano gobbansa afate fajjonsanni qooxeessinsanni fulte wolu qooxeessira hadhe dagate dancha fajjote loosi owaante uytanno gede diriirsinannita xawisino. Kunino, mittimmanna baxille gobbate bowirsa dandinnitanna huwanyo kalaqate kaa`lannota buuxisino.
Woxawaajje 19 , 2014 M.D
